سید شبیب رضوی کی وفات اردو زبان و ادب کے لیے بہت بڑا خسارہ: اردو کونسل

Syed Shabib Rizvis Death: جموں وکشمیر اردو کونسل نے سید شبیب رضوی کے انتقال پر تعزیت کرتے ہوئے کہا کہ سید شبیب رضوی کا انتقال اردو زبان و ادب کے لیے بڑا نقصان ہے۔

سرینگر:جموں وکشمیر اردو کونسل نے ڈاکٹر سید محمد شبیب رضوی کے انتقال پر انتہائی دکھ اور افسوس کا اظہار کیا۔ کونسل کی طرف سے جاری تعزیتی بیان میں کہا گیا ہے کہ موصوف کا انتقال اردو دنیا کے لیے بالعموم اور وادی کشمیر میں اردو زبان و ادب کے لیے ایک بڑا نقصان ہے۔ مرحوم اردو زبان و ادب کے منجھے ہوئے اساتذہ میں سے تھے جنہیں اردو زبان و ادب پر ٹھوس اور مکمل عبور حاصل تھا۔ وہ اردو املا، گرائمر اور تلفظ کے ماہر تھے اور زبان کے فعال اور سرگرم اصلاح کار تھے۔ ایک مدت تک ریڈیو کشمیر کے پروگرامز کے ذریعہ سے اردو الفاظ اور جملوں کی ساخت اور اصلاح کا کام کرتے رہے۔

جموں وکشمیر اردو کونسل کی نظروں میں شبیب رضوی کا انتقال اردو ادب اور زبان کے لیے ایک بڑا نقصان ہے۔ کونسل کے ذمہ داران اردو زبان کے تئیں مرحوم کی خدمات کو احترام کی نظروں سے دیکھتے ہیں۔ واضح رہے کہ اردو زبان کے معروف شاعر، ماہرِ علمِ ابجد اور خطاط سید شبیب رضوی طویل علالت کے بعد منگل کو اپنے رہائش گاہ واقع کاٹھی دروازہ سرینگر میں انتقال کر گئے۔ ان کی نماز جنازہ میں اردو زبان اور ادب سے متعلقہ شخصیات کے علاوہ دیگر کثیر تعداد نے شرکت کی۔