شوپیان کے دو ڈی ڈی سی ممبران کا استعفیٰ - JK Assembly Elections 2024

شوپیان میں دو ڈی ڈی سی ممبران نے استعفیٰ دے دیا ہے۔ یہ دونوں ڈی ڈی سی ممبران نیشنل کانفرنس سے تعلق رکھتے تھے۔ بتایا گیا ہے کہ وہ پارٹی کی جانب سے صلاحیت مند افراد کو ٹکٹ نہ دیے جانے سے ناراض تھے۔

شوپیان:نیشنل کانفرنس کو ایک اور بڑا دھچکا اُس وقت لگا جب شوپیان کے دو اہم ڈی ڈی سی ممبران نے پارٹی سے استعفیٰ دینے کا اعلان کیا۔ رام نگری شوپیان کی ڈی ڈی سی ممبر صفیہ ریاض اور شوپیان کے ڈی ڈی سی ممبر چودھری عبد الحمید نے ایک مشترکہ پریس کانفرنس کے دوران نیشنل کانفرنس سے علاحدگی اختیار کرنے کا فیصلہ کیا۔

پریس کانفرنس میں دونوں رہنماؤں نے اپنے استعفے کی وجوہات بیان کرتے ہوئے کہا کہ وہ ایڈووکیٹ شبیر احمد کُلے کو نیشنل کانفرنس کی جانب سے ٹکٹ نہ ملنے پر مایوس ہیں۔ انہوں نے کہا کہ ایڈووکیٹ شبیر احمد کُلے شوپیان کی عوام میں خاصا مقبول ہیں اور اُن کا نام عوامی سطح پر بڑے جوش و خروش سے لیا جا رہا تھا۔ تاہم، نیشنل کانفرنس کی اعلیٰ قیادت نے اُنہیں نظرانداز کرتے ہوئے شوپیان حلقۂ انتخاب سے شیخ محمد رفیع کو اپنا امیدوار نامزد کیا، جو کہ پارٹی کے اندرونی حلقوں میں مختلف رائے کا باعث بن گیا۔ صفیہ ریاض اور چودھری عبد الحمید نے نیشنل کانفرنس کی قیادت پر سخت تنقید کرتے ہوئے کہا کہ پارٹی نے شوپیان کی عوام کی اُمیدوں کو توڑ دیا ہے۔ انہوں نے کہا کہ نیشنل کانفرنس کے اس فیصلے نے نہ صرف پارٹی کے کارکنان کو مایوس کیا ہے بلکہ اس سے عوامی اعتماد بھی متزلزل ہوا ہے۔

صفیہ ریاض نے کہا، "ہمیں امید تھی کہ نیشنل کانفرنس شوپیان کے عوام کی خواہشات کا احترام کرے گی، مگر ایسا نہیں ہوا۔" چودھری عبد الحمید نے مزید کہا، "ہم نے اس پارٹی کے لیے بہت محنت کی تھی، مگر آج ہمیں یہ فیصلہ کرنا پڑا کہ عوام کے حق میں نیشنل کانفرنس سے علاحدہ ہو جائیں۔

یاد رہے کہ شوپیان حلقہ سے شیخ محمد رفیع کو امیدوار نامزد کرنے کے بعد سے ہی پارٹی کے اندر اور باہر مختلف ردعمل سامنے آ رہے ہیں۔ دیکھنا یہ ہے کہ نیشنل کانفرنس اس بحران سے کیسے نمٹتی ہے اور آئندہ انتخابات میں اس کے اثرات کس حد تک محسوس کیے جائیں گے۔