سوپور، پانی کی شدید قلت کے خلاف احتجاج

شمالی کشمیر کے سوپور علاقے میں پانی کی شدید قلت کے خلاف رہائشیوں نے احتجاج کیا۔

بارہمولہ:شمالی کشمیر کے بارہمولہ ضلع میں کے شیر کالونی، سوپور کے رہائشیوں نے علاقے میں پینے کے صاف پانی کی کمی کا حوالہ دیتے ہوئے محکمہ جل شکتی کے خلاف احتجاج کیا۔ شیر کالونی کے باشندوں نے پانی کی شدید قلت اور محکمہ جل شکتی کی عدم توجہی کا حوالہ دیتے ہوئے سوپور میں احتجاجی مظاہرہ کیا۔ احتجاج کے سبب تارو سوپور روڈ پر ٹریفک کی نقل و حمل بھی متاثر ہوئی۔

احتجاجی مظاہرین نے دعویٰ کیا کہ وہ گزشتہ 20 دنوں سے پینے کے پانی سے محروم ہیں اور ان کے تحفظات کو دور کرنے یا پانی کی فراہمی کے حوالہ سے متعلقہ محکمہ کی جانب سے کوئی بھی مثبت کوشش انجام نہیں دی جا رہی ہے۔ احتجاجیوں نے مایوسی کا اظہار کرتے ہوئے کہا کہ ’’انتخابی دور میں یہاں آنے والے اکثر رہنما اب لوگوں کو بھول گئے ہیں۔‘‘ احتجاجیوں کے مطابق صرف 15 دن قبل ہی جل شکتی محکمہ نے انہیں پانی کی سپلائی بحال کرنے کی یقین دہانی کرائی تھی۔ تاہم، وہ وعدہ وفا نہیں ہوا، جس کی وجہ سے وہ پہلے جیسی سنگین صورتحال میں ہیں۔

احتجاج کر رہی ایک مقامی خاتون نے بتایا: ’’ہم کافی عرصے سے پینے کے پانی سے محروم ہیں اور انتہائی مشکلات کا سامنا کر رہے ہیں۔ محکمہ کی جانب سے بار بار یقین دہانیوں کے باوجود وہ ہماری توقعات پر پورا اترنے میں مسلسل ناکام رہے ہیں۔‘‘ انہوں نے مزید کہا کہ جل شکتی محکمے کا دورہ کرنا ان کا اور دوسروں کے لیے روز کا معمول بن چکا ہے، پھر بھی حکام شاز و نادر ہی ان کی پریشانیوں پر توجہ دیتے ہیں۔

اس حوالہ سے جل شکتی محکمہ، سوپور کے ایک افسر نے بتایا کہ ’’ایک ٹیم صورتحال کا جائزہ لینے کے لیے جائے وقوعہ کا دورہ کرے گی۔‘‘ انہوں نے یقین دہانی کرائی کہ رہائشیوں کی تکالیف کو دور کرنے کے لیے اس معاملے کو فوری طور پر حل کیا جائے گا۔