یوم جمہوریہ کے موقع پر جموں و کشمیر میں انٹرنیٹ خدمات بند نہیں ہوں گی

No Internet Shutdown On Republic Dayآئی جی پی کشمیر نے کہا کہ یوم جمہوریہ کے موقعے پر جموں و کشمیر میں انٹرنیٹ سروس بند نہیں ہوگی۔ یوم جمہوریہ پر انٹرنیٹ خدمات بحال رہیں گی۔ عام لوگ بھی یوم جمہوریہ کی تقریب میں شرکت کر سکتے ہیں۔

سرینگر:مرکز کے زیر انتظام یوٹی جموں و کشمیر میں یوم جمہوریہ کے موقعے پر انٹرنیٹ خدمات بحال رکھنے کا فیصلہ کیا ہے۔ جموں کشمیر انتظامیہ کا کہنا ہے کہ یوم جمہوریہ کی تقاریب کو پر امن طریقے سے منانے کے لیے سکیورٹی کے تمام انتظامات کئے گئے ہیں اور 26 جنوری کو ہونے والی تقاریب میں عام لوگوں کو بھی دعوت ہے کہ وہ ان تقاریب میں شرکت کریں۔ سرینگر میں یوم جمہوریہ سے قبل کشمیر پولیس زون کے انسپکٹر جنرل ودھی کمار بردھی نے کہا کہ یوم جمہوریہ کے روز انٹرنیٹ خدمات کو معطل نہیں کیا جائے گا اور کوئی بھی بندش نافذ نہیں رہی گی۔

انہوں نے کہا کہ سکیورٹی فورسز نے نگرانی بڑھائی ہے تاکہ کوئی ناخوشگوار واقع پیش نہ آئے اور ان کو امید ہے کہ یوم جمہوریہ پر امن اور جشن کے ساتھ منایا جائے گا۔ گزشتہ دنوں کشمیر صوبہ کے کمشنر وجے کمار بدھوری نے کہا کہ عام لوگ بھی سرینگر کی تقریب میں شرکت کر سکتے ہیں اور ان کو کسی سکیورٹی پاس کی کوئی ضرورت نہیں ہوگی۔

وادی کشمیر میں سب سے بڑی تقریب سرینگر کے بخشی سٹیڈیم میں منعقد کی جائے گی جب کہ دیگر اضلاع میں ضلع ہیڈکواٹرز پر اس تقریب کا انعقاد ہوگا۔ ماضی میں یوم جمہوریہ اور یوم آزادی کی تقریب کو بحفاظت سے منعقد کرنے کے لیے انتظامیہ انٹرنیٹ خدمات کو معطل کر دیتی تھی۔ تاہم پانچ اگست 2019 کے بعد اب وادی میں انٹرنیٹ خدمات کو معطل نہیں کیا جارہا ہے جب کہ ان ایام پر عوام پر کوئی بندشیں بھی عائد نہیں کی جارہی ہے۔