سرینگر: انجمن اوقاف جامع مسجد سرینگر نے انجمن کے سربراہ اور میرواعظ کشمیر ڈاکٹر مولوی محمد عمر فاروق کو ریاستی انتظامیہ کی جانب سے مسلسل چوتھے جمعہ کو ان کی رہائش گاہ، میرواعظ منزل نگین میں نظر بند کیا گیا۔ انجمن نے ان کی منصبی اور دینی سرگرمیوں پر پابندی عائد کیے جانے کے اقدام کو حد درجہ افسوسناک اور طاقت کے بل پر کیا گیا اقدام قرار دیا۔
انہوں نے کہا کہ ایک ایسے موسم میں جبکہ شدید سردی کے باوجود کثیر تعداد میں عقیدت مند وادی کے مختلف اطراف سے مرکزی جامع مسجد میں جناب میرواعظ کے مواعظ حسنہ کو سننے کے لیے جمع ہوئے تھے۔ ریاستی انتظامیہ کا اس طرح کا اقدام ان عقیدت مندوں کے جذبات کو مجروح کرنے کے مترادف ہے۔
بیان میں کہا گیا کہ جناب میرواعظ کو آئے روز خصوصاً جمعہ کے دن پر گھر میں نظر بند کر کے، نہ صرف ان کو اپنی منصبی اور دینی فرائض کی ادائیگی انجام دینے سے روکا جا رہا ہے، بلکہ انتظامیہ کا اس طرح کا جارحانہ اقدام یہاں کے مسلمانوں کے لیے شدید اذیت کا بھی باعث بنتا ہے۔