سرینگر: کل جماعتی حریت کانفرنس کے چیرمین اور متحدہ مجلس علما جموں و کشمیر کے سربراہ میرواعظ ڈاکٹر مولوی محمد عمر فاروق نے گزشتہ دنوں کشتواڑ میں پانچ نوجوانوں کو فورسز کے ہاتھوں گرفتار اور بعد میں دوران حراست ان پر تشدد کئے جانے کے واقعہ کی مذمت کرتے ہوئے کہا ہے کہ ذرائع ابلاغ میں ان محبوسین کی تصویروں میں کھایا گیا ہے کہ ان کے جسموں پر شدید تشدد کے نشانات ہیں۔
مرکزی جامع مسجد سرینگر میں نماز جمعہ سے قبل ایک بھاری اجتماع سے خطاب کرتے ہوئے میرواعظ نے کہا کہ یہ بڑے افسوس کی بات ہے کہ جموںوکشمیر میں گزشتہ 35 سال سے حقوق انسانی کی خلاف ورزیوں کا سلسلہ برابر جاری ہے اور یہاں تعینات فورسز کو افسپا اور دیگر کالے قوانین کی صورت میں جو بے پناہ اختیارات حاصل ہےں ہم نے بارہا ان قوانین کے خاتمے کا مطالبہ کیا ہے ۔انہوں نے کہا کہ اس واقعہ کی تحقیقات ہونی چاہئے اور ملوث افراد کو قرار واقعی سزا ملنی چاہئے۔
میرواعظ نے کہا کہ اگرچہ یہ حقیقت ہے کہ اس طرح کی کارروائیوں میں ملوث فورسز اہلکاروں کو شاز و نادر ہی جواب دہ ٹھہرایا جاتا ہے تاہم امید کرتے ہیں کہ سرکاری حکام نے اس واقعہ کی تحقیقات کے حوالے سے جو انکوائری بٹھائی ہے اس کے مثبت نتائج برآمد ہوں گے۔ میرواعظ نے وقف ترمیمی بل کو پاس کئے جانے کی خبروں پر شدید تحفظات کا اظہار کرتے ہوئے کہا ہے کہ وقف قوانین میں ترمیم نہ مسلمانان ہند اور نہ ہی جموںوکشمیر کے مسلمانوں کو منظور تھا ، نہ ہے اور نہ ہوگا کیونکہ اس مسئلہ کا براہ راست تعلق ہمارے دین سے ہے اور وقف جائیداد جہاں پر بھی ہے شرعی لحاظ سے اس پر صرف مسلمانوں کو مالکان حقوق حاصل ہیں۔
انہوں نے بی جے پی کی حکمرانی والی ایک ریاست میں وہاں کی حکومت کی طرف سے ائمہ جمعہ اور خطیبوںکو یہ ہدایت کہ و ہ جمعہ کا خطبہ وقف سربراہ کی ہدایت کے بعد ہی دے سکتے ہیں پر شدید برہمی کا اظہار کرتے ہوئے اس اقدام کو مسلمانوں کے مذہبی حقوق اور مذہبی آزادی پر براہ راست حملہ قرار دیا اور کہا کہ اس طرح کا حکمنامہ سرکار کی سرپرستی میں قائم کسی بھی وقف بورڈکے حد اختیار سے باہر ہے اور اس طرح کے اقدامات وقف ترمیمی بل کے حوالے سے بی جے پی کے اصل عزائم کو بے نقاب کرتی ہے ۔
میر واعظ نے کہا کہ اس حوالے سے وہ ذاتی طور آل انڈیا مسلم پرسنل لاءبورڈ کی اعلیٰ قیادت اور دیگر مسلم رہنماﺅں کے ساتھ مسلسل رابطہ میں ہیں اور متحدہ مجلس علما جموں وکشمیر نے وقف ترمیمی بل کے ضمن میں باضابطہ مشترکہ پارلیمانی کمیٹی (جے پی سی) کو ایک یادداشت بھی پیش کی ہے جس میں اپنے تحفظات کے ساتھ ساتھ ان سے ملاقات کا وقت بھی طلب کیا گیا ہے تاکہ ہم اپنا نقطہ نظر پیش کرسکیں۔