کشمیر، بارشوں سے شبانہ درجہ حرارت میں کمی، 28 جون تک موسم خشک رہنے کی پیشگوئی - Kashmir Weather

وادی کشمیر میں گزشتہ روز ہوئی بارشوں کے سبب درجہ حرارت معمول سے کم ریکارڈ ہوا ہے۔ محکمہ موسمیات نے 28جون تک موسم خشک رہنے جبکہ 29اور 30جون کو ہلکی بارشوں کی پیشگوئی کی ہے۔

سرینگر (جموں کشمیر) :محکمہ موسمیات نے کشمیر میں 28 جون تک موسم خشک رہنے کی پیش گوئی کی ہے۔ وہیں وادی کشمیر میں بیشتر مقامات پر شبانہ درجہ حرارت معمول سے نیچے ریکارڈ کیا گیا ہے۔ محکمہ نے 23 سے 28 جون تک موسم مجموعی طور پر خشک رہنے کا بھی امکان ظاہر کیا ہے تاہم اس دوران کہیں کہیں ہلکی بارشوں کی بھی توقع ہے۔

گزشتہ روز یعنی 21جون کو کشمیر میں ہلکی بارش ہوئی جس سے لوگوں کو گرمی کی شدت سے کچھ حد تک راحت نصیب ہوئی۔ گزشتہ چوبیس گھنٹوں کے دوران دارالحکومت سرینگر میں 1.4 ملی میٹر بارش ریکارڈ ہوئی ہے جبکہ قاضی گنڈ میں 1.8 ملی میٹر اور کپوارہ میں 2.1 ملی میٹر بارش ریکارڈ ہوئی۔ وہیں محکمہ موسمیات نے 28جون تک موسم خشک رہنے کے علاوہ 29اور 30جون کو گرج چمک کے ساتھ بارشوں کی پیش گئی کی ہے۔

شمالی بھارت میں گرمی کی شدید تپش کے بیچ کشمیر میں خوشگوار موسم سیاحوں کے لیے کشش کا باعث بنا ہوا ہے۔ سیاح یہاں کے موسم سے کافی لطف اندوز ہو رہے ہیں۔ بیشتر سیاحتی مقامات پر سیاحوں کو گرم ملبوسات بشمول جیکٹ پہنے بھی دیکھا جا سکتا ہے۔ کشمیر میں بارشوں کے سبب شبانہ درجہ حرارت میں بھی معمول کے برعکس کمی واقع ہوئی ہے۔ سرینگر میں راست کا کم سے کم درجہ حرارت14.5 ڈگری سینٹی گریڈ ریکارڈ کیا گیا جو معمول سے1.3 ڈگری سینٹی گریڈ کم ہے۔ جبکہ سیاحتی مقام گلمرگ میں 5.6 ، سیاحتی مقام پہلگام میں 10.6 ڈگری سینٹی گریڈ، سرحدی ضلع کپوارہ میں 13.7اور قاضی گنڈ میں 13.2 ڈگری سینٹی گریڈ ریکارڈ کیا گیا ہے۔