وزیر اعلیٰ عمر عبداللہ کی سربراہی میں جموں و کشمیر کابینہ نے ریاست کی بحالی کی قرارداد منظور کی ہے۔ جمعرات کو جموں و کشمیر حکومت کی پہلی کابینی میٹنگ میں ایک قرارداد منظور کرکے مرکزی حکومت سے ریاست کا درجہ بحال کرنے پر زور دیا گیا۔ ذرائع کے مطابق قرارداد کا مسودہ تیار کر لیا گیا ہے اور وزیر اعلیٰ ایک یا دو دن میں نئی دہلی جائیں گے تاکہ قرارداد کا مسودہ وزیر اعظم نریندر مودی کو پیش کرکے جموں و کشمیر کا ریاستی درجہ بحال کرنے کا مطالبہ کیا جائے۔
کابینی اجلاس کی صدارت وزیر اعلیٰ عمر عبداللہ نے کی اور اس میں نائب وزیر اعلی سریندر چودھری اور وزراء سکینہ مسعود ایتو، جاوید احمد رانا، جاوید احمد ڈار اور ستیش شرما نے شرکت کی۔ کانگریس جے کے پی سی سی کے صدر طارق حمید قرہ نے صحافیوں کو بتایا کہ جب تک ریاست کا درجہ بحال نہیں کیا جاتا پارٹی جموں و کشمیر کابینہ میں شامل نہیں ہوگی۔ این سی کے صدر فاروق عبداللہ نے اس اعتماد کا اظہار کیا کہ مرکز کی جانب سے جلد ہی جموں و کشمیر کا ریاستی درجہ بحال کردیا جائے گا۔ انہوں نے کہا کہ ’ہم نے پہلے بھی ریاستی حیثیت کے بارے میں بات کی ہے اور سپریم کورٹ نے بھی دو ماہ کے اندر ریاست کا درجہ بحال کرنے کی درخواست پر سماعت کرنے سے اتفاق کیا ہے۔ مجھے یقین ہے کہ حکومت ہند جلد ہی ریاست کا درجہ بحال کردے دی‘۔