اننت ناگ: پولیس نے بھاری مقدار میں منشیات برآمد کی، دو منشیات فروش گرفتار

اننت ناگ میں جموں و کشمیر پولیس نے بڑی مقدار میں منشیات ضبط کیا ہے۔ پولیس نے دو ڈرگ پیڈلرز کو گرفتار کیا ہے۔

اننت ناگ (اشفاق احمد میر): جنوبی کشمیر کے اننت ناگ ضلع میں جموں و کشمیر پولیس نے منشیات کے خلاف جاری مہم میں دو منشیات فروشوں کو گرفتار کیا ہے۔ پولیس نے ان کے قبضے سے نشہ آور اشیاء برآمد کیں۔

اننت ناگ پولیس کے مطابق، تھانہ متن کو معتبر ذرائع سے ایک خاص اطلاع ملی تھی کہ فاروق احمد کمار ولد محمد سبحان کمار ساکن کھل چوہڑ متن نامی ایک شخص نشہ آور اشیاء کی فروخت میں ملوث ہے اور اس کے مطابق اس نے اپنے رہائشی مکان میں بھاری مقدار میں نشہ آور اشیاء جمع کر رکھی ہیں۔

اس کے مطابق تھانہ متن میں این ڈی پی ایس ایکٹ کی متعلقہ دفعات کے تحت مقدمہ درج کر کے تفتیش شروع کر دی گئی۔ اس اطلاع کے ملنے پر اننت ناگ پولیس اور متعلقہ ایگزیکٹیو مجسٹریٹ پر مشتمل ایک ٹیم تشکیل دی گئی جس نے مذکورہ مکان کی تلاشی لی۔ تلاشی کے دوران مذکورہ مکان سے تقریباً 10 کلو چرس پاؤڈر اور 216650 روپے کی نقدی برآمد ہوئی۔ مذکورہ مکان کے مالک کو گرفتار کر کے ممنوعہ سامان ضبط کر لیا گیا۔ کیس میں مزید تفتیش جاری ہے۔

تھانہ پہلگام کی پولیس پارٹی نے لنگا بل پہلگام میں ایک ناکہ لگایا اور شیخ محلہ سالار کے رہنے والے ایک شخص شاہ رخ احمد شیخ ولد محمد رمضان شیخ کو گرفتار کرکے اس کے قبضے سے 120 گرام چرس برآمد کی۔ اس سلسلے میں پولیس اسٹیشن پہلگام میں ایک کیس درج کیا گیا، ملزم کو گرفتار کرکے منشیات ضبط کی گئی۔