بانڈی پورہ:اپنی پارٹی کے حلقہ سوناواری کے انچارج لیڈر امتیاز پرے نے جمہوری عمل میں حصہ لینے کے لیے جماعت اسلامی کے رہنماؤں کے فیصلے کا خیرمقدم کرتے ہوئے کہا کہ یہ عوام کے مسائل کو حل کرنے کا واحد راستہ ہے۔
اسی کے ساتھ امتیاز پرے نے منگل کو نیشنل کانفرنس پر حملہ کرتے ہوئے کشمیری نوجوانوں کے خلاف عوام دشمن پالیسیاں اپنانے کا الزام لگایا۔ انہوں نے کہا کہ وہ لوگوں کو بے وقوف بنا رہے ہیں۔ ان کے مطابق "جو پارٹی اب کہہ رہی ہے کہ وہ پی ایس اے (پبلک سیفٹی ایکٹ) واپس لے لیں گے، ان سے پوچھیے کہ اسے یہاں کس نے لایا ہے۔"
انہوں نے یہ مزید کہا کہ روایتی سیاسی جماعتوں نے لوگوں کو بہت بے وقوف بنایا ہے، اب وہ دور ختم ہو گیا ہے۔ نوجوان اب کس کو منتخب کریں، انہوں نے گزشتہ انتخابات میں یہ کر کے دکھا دیا۔
"وہ نہ صرف یہاں پی ایس اے لائے بلکہ انہوں نے ہمارے نوجوانوں پر آنسو گیس کا استعمال بھی کیا،"۔ انہوں نے مزید کہا کہ عوام کی بھلائی کے لیے کام کریں گے اور ان کا کسی جماعت سے اتحاد نہیں ہے۔ قابل ذکر ہے کہ جموں و کشمیر میں اسمبلی انتخابات کے اعلان کے بعد سیاسی سرگرمیاں عروج پر ہے۔