شمالی کشمیر میں تازہ برف باری

ضلع بانڈی پورہ کے رازدان ٹاپ پر تازی برفباری ہوئی تاہم گریز بانڈی پورہ روڈ ہر ٹریفک کی آمد و رفت جاری ہے۔

بانڈی پورہ (جموں کشمیر) :شمالی کشمیر کے بانڈی پورہ ضلع میں بدھ کی صبح ہلکی برف باری ہوئی۔ برفباری کے سبب گرچہ سردی میں اضافہ ہوا تاہم گریز - بانڈی پورہ روڈ پر آمد و رفت متاثر نہیں ہوئی۔ سرحدی علاقہ گریز کو قصبہ بانڈی پورہ سے جوڑنے والے رازدان ٹاپ کو برف کی سفید چادر نے ڈھک لیا جو ایک دیدہ زیب نظارہ پیش کرتا ہے۔

حکام نے بتایا کہ برف باری کے باوجود گریز - بانڈی پورہ روڈ پر ٹریفک بدستور جاری ہے۔ حکام کا کہنا ہے کہ 6 اکتوبر کو رواں موسم کی پہلی برفباری ہوئی۔ تازی برفباری کے سبب علاقے میں سردی کی شدت میں اضافہ ہوا ہے۔ حکام نے بتایا کہ متعلقہ اہلکار سڑک کی حالت پر گہری نظر رکھے ہوئے ہیں، کیونکہ یہ علاقہ سخت سردیوں کے دوران بھاری برفباری کے سبب کئی مہینوں تک بند رہتی ہے۔

ادھر، حکام نے گریز - بانڈی پورہ روڑ پر سفر کرنے والے مسافرین سے اس سڑک پر سفر کرنے سے قبل محکمہ ٹریفک سے رابطہ قائم کرنے کی اپیل کی ہے۔ یاد رہے کہ کشمیر میں برفباری سے لطف اندوز ہونے کے لیے ہر سال ہزاروں سیاح وادی کا رخ کرتے ہیں۔ برفباری سے نہ صرف کشمیر کی سیاحت کو فروغ ملتا ہے بلکہ برفباری سے یہاں کا ماحولیاتی تواز بھی برقرار رہتا ہے۔