بارہمولہ میں ترقیاتی کام نہیں ہوئے اور عوام کو دھوکہ دیا گیا: آزاد امیدوار توصیف رینا - Assembly Election 2024

جموں و کشمیر میں 18 ستمبر سے انتخابات شروع ہونگے ایسے میں سیاسی پارٹیوں کے علاوہ آزاد امیدواروں نے بھی لوگوں سے وعدے کرنا شروع کردئے ہیں۔ توصیف رینا جو بارہمولہ میونسپل کونسل کے چیئرمین بھی رہے ہیں اس بار آزاد امیدوار کی حیثیت سے الیکشن لڑرہے ہیں۔

بارہمولہ: جموں کشمیر اسمبلی انتخابات کے حوالے سے بات کریں تو ضلع بارہمولہ میں بھی دوسرے اضلاع کی طرح سیاسی سرگرمیاں کافی تیز ہیں اور یہاں سیاسی جماعتوں کے امیدوار کے علاوہ آزاد امیدوار بھی اپنی قسمت آزمانے کے لئے میدان میں اترے ہیں۔

ای ٹی وی بھارت کے ساتھ خصوصی گفتگو کرتے ہوئے ایک آزاد امیدوار توصیف رینا نے بھی انتخابات میں شرکت کرنے کا فیصلہ کیا ہے۔ توصیف رینا بارہمولہ کے اولڈ ٹاؤن سے تعلق رکھتے ہے اور اس سے پہلے وہ بارہمولہ میونسپل کونسل کے چیئرمین بھی رہے ہیں۔

انہوں نے ای ٹی وی بھارت سے گفتگو کرتے ہوئے کہا کہ وہ ایک عام انسان ہیں لیکن ان کا سیاست میں آنا مجبوری ہے کیونکہ جو وقت کے سیاست دان ہیں انہوں نے بارہمولہ کے ساتھ ناانصافی کی ہے کیونکہ جب ہم بارہمولہ کی بات کرتے ہیں تو ہمیں ترقی کے نام پر کچھ بھی نظر نہیں آتا ہے۔

انہوں نے کہا کہ بارہمولہ میں ترقیاتی کام ہونے چاہیے کیونکہ یہ ایک بہت ہی پورانا شہر ہے اور جب میں میونسپل کونسل بارہمولہ کا صدر تھا تو میں نے کافی ترقیاتی منصوبوں پر کام کیا لیکن بدقسمتی سے مجھے کام نہیں کرنے دیا گیا اور دو بار تحریک عدم اعتماد (نو کانفیڈنس موشن) بھی کیا گیا۔

انہوں نے بتایا کہ بارہمولہ کے نوجوانوں کے لئے کام کرنے کی ضرورت ہے کیونکہ اس وقت بے روزگاری کافی زیادہ ہے اور جو غریب لوگ ہیں وہ دن بھر مزدوری کرتے ہیں مگر اتنی اجرت نہیں مل پاتی ہے جو ملنا چاہئے۔ ان کو دوسرے کام بھی دینے کی ضرورت ہے۔

انہوں نے بتایا کہ ہمارے نوجوانوں کو شروع شروع میں غلط کاموں کی طرف راغب کیا جاتا تھا لیکن اب لوگ کام کرنا چاہتے ہیں۔ میں چاہتا ہوں جس طرح سے کشمیر میں اب صورتحال بہتر ہے ان نوجوانوں کو بہتر روزگار دیا جائے تاکہ کل کو وہ غلط کاموں کی طرف نا جاپائیں۔

انہوں نے مزید کہا کہ نوجوانوں کو پاسپورٹ ورفیکیشن اور دیگر ورفیکیشن کے لئے کبھی تنگ کیا جاتا ہے مگر اب ایسا نہیں ہے اور میں وعدہ کرتا ہوں کہ میں اس کے لیے کام کروں گا۔ توصیف نے کہا نے اب وقت بدل چکا ہے اور جو پچھلے سیاست دان ہیں وہ جھوٹ کی سیاست کرتے تھے لیکن آج کا نوجوان سمجھدار ہے اور وہ آگے بڑھنا چاہتا ہے اس کو بس رہنمائی کی ضرورت ہے اور میں اس کمی کو پورا کرنے کی کوشش کروں گا۔