شوپیان: پیپلز ڈیموکریٹک پارٹی (پی ڈی پی) کے ضلع صدر اور سابق ایم ایل اے وچی شوپیان، اعجاز احمد میر نے پارٹی سے استعفیٰ دے دیا ہے۔ انہوں نے استعفیٰ کا اعلان اپنے آبائی علاقے زینہ پورہ شوپیان میں منعقدہ ورکرز کنونشن کے دوران کیا۔ انہوں نے بتایا کہ وہ آنے والے اسمبلی انتخابات میں آزاد امیدوار کے طور پر حصہ لیں گے۔ انہوں نے انتخابات لڑنے کا اعلان کیا۔
اعجاز میر نے پیپلز ڈیموکریٹک پارٹی کی طرف سے آنے والے اسمبلی انتخابات کیلئے نامزد کیے گئے امیداورں کی لسٹ سامنے آنے کے بعد پارٹی سے مستعفیٰ ہونے کا اعلان کردیا۔ اعجاز میر نے جو ضلع ترقیاتی کونسل (ڈی ڈی سی) کے رکن بھی ہیں نے کہا کہ پارٹی کی جانب سے کسی اور کو ٹکٹ دیے جانے کی خبر نے مجھے حیرت میں ڈال دیا، کیونکہ پارٹی نے اس سلسلہ میں میرے ساتھ کوئی مشورہ نہیں کیا۔ انہوں نے بتایا کہ وہ اپنے حلقہ میں ایک پارٹی کنونشن میں تھے، اس دوران اطلاع ملی کہ پارٹی نے کسی اور کو امیدوار بنایا ہے۔
انہوں نے کہا کہ ’کسی اور کو ٹکٹ دینے سے پہلے پارٹی کو مجھ سے مشورہ کرنا چاہئے تھا اور مجھے اعتماد میں لینا تھا۔ انہوں نے پارٹی کے رویہ کو ذلت آمیز قرار دیا اور کہا کہ انسان سب کچھ برداشت کر سکتا ہے لیکن ذلت برداشت نہیں کر سکتا، اسی لیے میں نے پی ڈی پی پارٹی چھوڑنے کا فیصلہ کیا ہے۔ انہوں نے بتایا کہ وہ انتخاب ضرور لڑیں گے، لیکن حتمی فیصلہ اپنے کارکنوں کے ساتھ مشاورت کے بعد کریں گے۔ اعجاز میر نے بتایا کہ ٹکٹ دینے کا حق پارٹیوں کے بجائے عوام کا ہوتا ہے اور مجھے امید ہے کہ عوام مجھے ووٹ دے کر اپنے اعتماد کا اظہار کریں گے۔