دہلی: شاستری نگر میں چار منزلہ عمارت میں بھیانک آتشزدگی، دو بچوں سمیت چار افراد کی موت

شاہدرہ کے علاقے شاستری نگر میں جمعرات کی علی الصبح رہائشی عمارت میں آگ لگنے سے دو بچے اور ایک شادی شدہ جوڑا دم گھٹنے سے فوت ہوگیا۔

نئی دہلی:دہلی کے گیتا کالونی تھانہ علاقے کے شاستری نگر علاقے میں چار منزلہ عمارت میں آگ لگ گئی۔ اطلاع کے بعد فائر بریگیڈ کی ٹیم موقع پر پہنچی، عمارت میں پھنسے نو افراد کو نکال کر اسپتال میں داخل کرایا گیا۔ ڈاکٹروں نے دو لڑکیوں سمیت چار افراد کو مردہ قرار دے دیا۔ فائر بریگیڈ نے آگ پر قابو پا لیا ہے اور مزید کارروائی کی جا رہی ہے۔

شاہدرہ ضلع کے ڈی سی پی سریندر چودھری نے بتایا کہ صبح تقریباً 5:22 بجے شاستری نگر کی گلی نمبر 13 میں ایک مکان میں آگ لگنے کی اطلاع ملی۔ اطلاع ملتے ہی پولیس کی ٹیم موقع پر پہنچ گئی اور فائر بریگیڈ کو بلایا گیا۔ آگ چار منزلہ عمارت کے تہہ خانے میں لگی۔ دھوئیں نے پوری عمارت کو اپنی لپیٹ میں لے رکھا تھا۔

عمارت میں پھنسے نو افراد کو ریسکیو کیا گیا اور انھیں اسپتال لے جایا گیا جہاں ڈاکٹروں نے دو بچوں سمیت چار افراد کو مردہ قرار دے دیا۔ ڈی سی پی نے بتایا کہ مرنے والوں کی شناخت 30 سالہ منوج اور 28 سالہ سمن کے طور پر کی گئی ہے جب کہ متوفی لڑکی کی عمر 5 سال اور 3.5 سال ہے۔ انہوں نے بتایا کہ لاش کو تحویل میں لے کر پوسٹ مارٹم کے لیے بھیج دیا گیا ہے اور مزید کارروائی کی جارہی ہے۔ موقع پر پہنچنے والے فائر آفیسر کا کہنا ہے کہ ابتدائی تحقیقات سے معلوم ہوا ہے کہ آگ سب سے پہلے تہہ خانے میں کھڑی گاڑیوں میں لگی اور اس کا دھواں عمارت میں پھیل گیا۔