کانگریس نے ای وی ایم پر اٹھائے سوال، الیکشن کمیشن نے تین دسمبر کو بات چیت کے لیے بلایا

کانگریس کے وکیل کو لکھے گئے خط میں الیکشن کمیشن نے کانگریس پارٹی کا شکریہ ادا کیا، کہ وہ اس مسئلہ کو نوٹس میں لائے۔

نئی دہلی: کانگریس نے ووٹنگ کے اعداد و شمار اور ڈرافٹ ووٹر لسٹ میں مبینہ تضادات کی شکایت الیکشن کمیشن آف انڈیا سے کی تھی۔ الیکشن کمیشن نے اس معاملے پر مزید بات چیت کے لیے کانگریس کے وفد کو 3 دسمبر کو مدعو کیا ہے۔

کانگریس کے وکیل عمر ہدا کو لکھے گئے خط میں الیکشن کمیشن کے سکریٹری ایس کے داس نے کانگریس پارٹی کا شکریہ ادا کیا کہ وہ اس معاملے کو ان کے نوٹس میں لائے۔

خط میں کہا گیا ہے کہ 'مہاراشٹر میں ووٹروں کے ناموں کو شامل کرنے اور حذف کرنے کے بارے میں پہلے الزام کے سلسلے میں' جیسا کہ کانگریس کو معلوم ہے کہ ووٹر لسٹ ہمیشہ تمام سیاسی جماعتوں کی قریبی شرکت کے ساتھ تیار کی جاتی ہے اور اس کو حتمی شکل دی جاتی ہے۔ ووٹر لسٹ تمام سیاسی جماعتوں کو دی جاتی ہے اور سیاسی جماعتیں تصدیقی عمل کے ہر مرحلے میں شامل ہوتی ہیں۔

ووٹنگ فیصد میں فرق کے بارے میں الیکشن کمیشن نے پارٹی کو لکھے اپنے پہلے خط کا حوالہ دیتے ہوئے کہا کہ وجوہات پہلے ہی منظر عام پر آچکی ہیں۔

کانگریس کے کیا الزامات ہیں؟

کانگریس پارٹی نے حکمراں بی جے پی پر مہاراشٹر اسمبلی انتخابات کے دوران ڈالے گئے ووٹوں اور گنتی کے درمیان بہت زیادہ فرق کی وجہ سے دھاندلی کا الزام لگایا ہے۔ ملک کی سب سے پرانی پارٹی نے یہ بھی الزام لگایا کہ ان کے کئی ووٹروں کے نام ووٹر لسٹ سے نکال دیے گئے ہیں۔ الیکشن کمیشن نے کانگریس کے ایک وفد کو منگل کو اپنے دفتر میں مدعو کیا ہے تاکہ اس مسئلے پر ذاتی طور پر بات چیت کی جا سکے۔

مہاراشٹرا اسمبلی انتخابات کے نتائج میں مہایوتی اتحاد کو بھاری اکثریت حاصل ہوئی ہے۔ بی جے پی نے 132 سیٹیں جیتی ہیں، شیو سینا نے 57 اور این سی پی نے 41 سیٹیں جیتی ہیں۔ کانگریس صرف 16 سیٹوں پر سمٹ گئی، جب کہ اس کی اتحادی شیوسینا (یو بی ٹی) کو 20 اور این سی پی (ایس پی) کو 10 سیٹیں ملیں۔