ضمنی انتخابات 2024: اترپردیش، پنجاب، کیرالہ اور اتراکھنڈ کی 15 سیٹوں پر ووٹنگ جاری

یو پی کی 9، پنجاب کی 4 اور اتراکھنڈ، کیرالہ کی ایک ایک اسمبلی سیٹ پر ضمنی انتخابات کے تحت ووٹ ڈالے جا رہے ہیں۔

نئی دہلی: مہاراشٹر میں 288 اسمبلی نشستوں جبکہ جھارکھنڈ میں دوسرے مرحلے کے تحت 38 سیٹوں پر آج ووٹ ڈالے جا رہے ہیں۔ دوسری جانب آج چار ریاستوں کی 15 اسمبلی نشستوں پر ضمنی انتخابات کے لیے ووٹنگ جاری ہے۔ ان میں یو پی کی 9، پنجاب کی 4 اور اتراکھنڈ، کیرالہ کی ایک ایک اسمبلی سیٹ شامل ہے۔

یوپی کی 9 اسمبلی سیٹوں پر ووٹنگ:

اتر پردیش کی کٹہاری، کرہل، میرا پور، غازی آباد، ماجھوان، سیساماؤ، کھیر، پھول پور اور کندرکی اسمبلی سیٹوں پر پولنگ جاری ہے۔ مرادآباد کی کندرکی-29 اسمبلی سیٹ پر کل ووٹرز کی تعداد 383488 ہے جس میں 207990 مرد اور 175485 خواتین کے علاوہ 13 ٹرانسجینڈر ووٹرز بھی شامل ہیں۔ آج صبح سے ہی کندرکی کی عوام نے پولنگ بوتھ کی جانب رخ کرنا شروع کر دیا اور اپنی حق رائے دہی کا استعمال کیا۔

کندر کی اسمبلی سیٹ سے سماجوادی پارٹی نے حاجی رضوان کو اپنا امیدوار بنایا ہے جو پہلے بھی کندرکی سیٹ سے تین مرتبہ جیت حاصل کر چکے ہیں تو وہیں بھارتیہ جنتا پارٹی نے ٹھاکر رامویر پر اپنا بھروسہ جتایا ہے حالانکہ رامویر ماضی میں بھی اس سیٹ سے ہاتھ ازما چکے ہیں مگر ان کو تین بار ہار کا سامنا کرنا پڑا ہے۔ اس کے علاوہ اسد الدین اویسی کی پارٹی ال انڈیا مجلس اتحاد المسلمین نے حاجی وارث کو اپنا امیدوار بنایا ہے تو بہوجن سماج پارٹی نے حاجی رفت اللہ عرف نیتا چھدہ کو اپنا امیدوار بنایا ہے۔

یوپی کی 9 اسمبلی سیٹوں کے ضمنی انتخاب میں شامل مین پوری ضلع کی کرہل سیٹ پر صبح سات بجے سے ووٹنگ شروع ہو گئی ہے۔ کرہل سیٹ پر 7 امیدوار جیتنے کی بھرپور کوشش کر رہے ہیں۔ یوپی کے پریاگ راج ضلع کی پھول پور اسمبلی سیٹ پر ضمنی انتخاب کے لیے ووٹنگ صبح سات بجے شروع ہو گئی ہے۔ پھول پور ضمنی انتخاب میں بی جے پی، ایس پی، بی ایس پی سمیت کل 12 امیدوار اپنی قسمت آزما رہے ہیں۔ یوپی کے غازی آباد ضلع کی صدر اسمبلی سیٹ کے ضمنی انتخاب کے لیے ووٹنگ جاری ہے۔ غازی آباد صدر سیٹ کے ضمنی انتخاب میں ایس پی، بی ایس پی اور بی جے پی سمیت کل 14 امیدوار میدان میں ہیں۔ بی ایس پی نے پرمانند گرگ، بی جے پی نے سنجیو شرما، ایس پی نے سنگھ راج جٹاو کو نامزد کیا ہے۔ کل 4 لاکھ 61 ہزار 360 ووٹرز آج ان 14 امیدواروں کی قسمت کا فیصلہ کر رہے ہیں۔

پنجاب: چار اسمبلی نشستوں پر ضمنی انتخاب:

پنجاب کی چار اسمبلی سیٹوں پر آج ضمنی انتخابات ہو رہے ہیں۔ ووٹنگ صبح سات بجے شروع ہو گئی ہے۔ الیکشن کمیشن نے منصفانہ اور پرامن ووٹنگ کے لیے سیکیورٹی کے سخت انتظامات کیے ہیں۔ صبح ووٹروں میں جوش و خروش کم تھا۔ ووٹنگ شام 6 بجے تک جاری رہے گی۔

پنجاب کی برنالہ، ڈیرہ بابا نانک، چبےوال اور گدربہا کی نشستوں پر ضمنی انتخابات ہو رہے ہیں۔ ان حلقوں کی نمائندگی کرنے والے ارکان اسمبلی اس سال کے شروع میں ہونے والے عام انتخابات کے دوران لوک سبھا کے لیے منتخب ہوئے تھے، اس لیے ضمنی انتخابات منعقد کیے جا رہے ہیں۔ تین خواتین سمیت 45 امیدوار میدان میں ہیں۔ کل 6.96 لاکھ ووٹر اپنا حق رائے دہی استعمال کرنے کے اہل ہیں۔

ضمنی انتخاب میں نمایاں امیدواروں میں بی جے پی کے امیدوار اور پنجاب کے سابق وزیر خزانہ من پریت سنگھ بادل، کانگریس کی امرتا ویڈنگ، جتندر کور، عآپ کے ہردیپ سنگھ ڈمپی ڈھلون، ڈاکٹر اشنک کمار چبیوال اور بی جے پی کے کیول سنگھ ڈھلون، سوہن سنگھ تھنڈل اور رویکرن سنگھ کاہلون شامل ہیں۔

کیرالہ اور اتراکھنڈ کی ایک ایک اسمبلی سیٹ پر ضمنی انتخاب:

اتراکھنڈ کی کیدارناتھ اسمبلی سیٹ پر ضمنی انتخاب کے لیے ووٹنگ جاری ہے۔ ووٹنگ کے لیے لوگوں میں کافی جوش و خروش دیکھا جا رہا ہے۔ لوگ صبح ہوتے ہی ووٹ ڈالنے گھروں سے نکلنا شروع ہو گئے اور قطاروں میں کھڑے اپنی باری کا انتظار کرتے نظر آئے۔ کیدارناتھ اسمبلی ضمنی انتخاب میں، حکمراں بی جے پی اور اپوزیشن کانگریس کے درمیان سیدھا مقابلہ سمجھا جا رہا ہے۔ اس ہاٹ سیٹ کے لیے چھ امیدوار میدان میں ہیں۔ کیدارناتھ اسمبلی سیٹ پر 90 ہزار 875 ووٹر امیدواروں کی قسمت کا فیصلہ کریں گے۔

وہیں، کیرالہ کی پالکڈ اسمبلی سیٹ پر دلچسپ انتخابی مہم کے بعد آج پولنگ بوتھس پر ووٹروں کی لمبی لمبی قطاریں دیکھنے کو مل رہی ہیں۔ ووٹنگ صبح سات بجے شروع ہوئی اور شام 6 بجے تک جاری رہے گی۔ حلقے میں 185 پولنگ بوتھ بنائے گئے ہیں۔