ایئر انڈیا کے طیارے کو بم سے اڑانے کی دھمکی، ترواننت پورم ہوائی اڈے پر ایمرجنسی کا اعلان - Air India flight bomb threat

ایئر انڈیا کے ایک طیارے کو آج صبح بم سے اڑانے کی دھمکی ملی۔ کیرالہ کے ترواننت پورم ہوائی اڈے پر پرواز کی ہنگامی لینڈنگ کی گئی۔ مسافروں کو جلدی سے باہر نکالا گیا۔ بم کی اطلاع ملنے کے بعد ایئرپورٹ کو ہائی الرٹ کر دیا گیا۔

ترواننت پورم:ایئر انڈیا کے ایک طیارے کو بم کی دھمکی ملی ہے۔ جانکاری کے مطابق یہ فلائٹ ممبئی سے ترواننت پورم جا رہی تھی۔ یہ پرواز بحفاظت ہوائی اڈے پر اتر گئی ہے۔ مسافروں کو جہاز سے نکال لیا گیا ہے۔ بم سے اڑانے کی دھمکی ملنے کے بعد ہنگامہ مچ گیا۔ اسی کے ساتھ ہوائی اڈے پر ایمرجنسی کا اعلان کر دیا گیا ہے۔ طیارے کو لینڈ کرنے کے بعد آئسولیشن بے میں رکھا گیا ہے۔ تروننت پورم ایئرپورٹ پر سکیورٹی بڑھا دی گئی ہے۔

ترواننت پورم بین الاقوامی ہوائی اڈے کی طرف سے جاری کردہ ایک بیان کے مطابق، ایئر انڈیا کی پرواز 657 کو جمعرات کی صبح 7.30 بجے بم کی دھمکی موصول ہوئی۔ اس کے بعد ہوائی اڈے پر ایمرجنسی نافذ کر دی گئی۔ طیارہ بحفاظت لینڈ کر گیا۔ اسے آئسولیشن بے میں کھڑا کیا گیا ہے۔ اس کے بعد طیارے میں سوار تمام مسافروں اور عملے کے ارکان کو فوری طور پر باہر نکال لیا گیا۔

بتایا جا رہا ہے کہ ہوائی اڈے کا آپریشن فی الحال خوش اسلوبی سے جاری ہے۔ معاملے کی مزید تفتیش جاری ہے۔ بتایا جارہا ہے کہ اسپیشل پولیس فورس نے طیارے کو اپنے قبضے میں لے لیا ہے اور تحقیقات کی جارہی ہے۔

آپ کو بتاتے چلیں کہ اس سے قبل جون کے شروع میں پیرس چارلس ڈی گال ایئرپورٹ سے روانہ ہونے والی وسٹارا کی پرواز میں دھمکی آمیز نوٹ ملا تھا۔ بتایا گیا کہ اس میں بم تھا۔ اس کے بعد ممبئی ایئرپورٹ پر الرٹ جاری کر دیا گیا۔ طیارے میں 294 مسافر اور عملے کے 12 ارکان سوار تھے۔ طیارہ ممبئی کے چھترپتی شیواجی مہاراج بین الاقوامی ہوائی اڈے پر بحفاظت اتر گیا۔ پولیس اور سکیورٹی فورسز نے مکمل تفتیش کی تاہم طیارے میں کوئی مشکوک چیز نہیں ملی۔ بعد میں اسے فرضی دھمکی قرار دے دیا گیا۔