Yadadri devotees Problems : పొంచి ఉన్న ప్రమాదం.. శిథిలావస్థలో యాదాద్రి మొదటి కమాన్​ పిల్లర్ - Yadadri devotees Problems

Yadadri first arch pillar in ruins : యాదగిరి గుట్ట పట్టణం నుంచి శ్రీ పాతగుట్ట లక్ష్మీ నరసింహ స్వామి ఆలయానికి వెళ్లే దారిలో మొదటి కమాన్ కుడి వైపు పిల్లర్ శిథిలావస్థలో ఉంది. పిల్లర్​ బీటలు వారి ఉండటంతో ఎప్పుడు ఏమవుతుందనే భయంతో దుకాణదారులు, భక్తులు ఆందోళన చెందుతున్నారు. నిత్యం రద్దీగా ఉండే ఈ ప్రాంతంలో పురాతన కమాన్ ఉండటంతో పాటు గాలులు, వర్షాలు నేపథ్యంలో ఎప్పుడు పడిపోతుందో తెలియని పరిస్థితి. పాత గుట్టకు వెళ్లే భక్తులు ఆటోలు, కార్లు, గుర్రపు బగ్గీలతో నిత్యం ఈ దారి నుంచే ప్రయాణం సాగిస్తుంటారు. ఈ కమాన్ మార్గం నుంచే మరి కొన్ని గ్రామాల ప్రజలు రాకపోకలు సాగిస్తుంటారు. ప్రస్తుతం కమాన్​ పిల్లర్​ పూర్తిగా బీటలు చెంది అప్పుడో, ఇప్పుడో అన్నట్లుగా ఉంది. దీంతో స్థానికులు ఈ మార్గం ద్వారా ప్రయాణించాలంటనే భయపడిపోతున్నారు. ఈ కమాన్​ నిర్మాణం 1-1-1975వ సంవత్సరంలో హైదరాబాద్​కు చెందిన స్వామి వారి భక్తులు శ్రీ పొట్ట లక్ష్మయ్య యాదవ్​, శ్రీమతి గండెమ్మ దంపతులు నిర్మించినట్లు స్థానికులు చెబుతున్నారు. దీనిని నిర్మించి సుమారు 48 సంవత్సరాలు కావడంతో పూర్తిగా శిథిలావస్థకు చెందింది. ప్రమాదం జరగక మునుపే ఆలయ అధికారులు స్పందించి మరమ్మతులు చేపట్టాలని భక్తులు, స్థానికులు విజ్ఞప్తి చేస్తున్నారు.