అక్కడ అబ్బాయి పుడితే మగాళ్లను మహిళలు చితక్కొడతారు.. ఎందుకో తెలుసా..?

Doond Festival Celebrates In Bhadradri Kothagudem: ఆ గిరిజన తండాలో మగపిల్లవాడు పుడితే ఆ తండాలోని మహిళలు పురుషులను కర్రలతో కొడుతూ.. పండుగ జరుపుకుంటారు. ఆ పండగనే "డుండ్​ పండగ" అంటారు. ఇది వారికి వంశపారం పర్యంగా వస్తున్న సంప్రదాయం. అయితే ఈ పండగును చూడాలనుకుంటే మాత్రం భద్రాద్రి కొత్తగూడెం జిల్లాలోని కారేపల్లి మండలం సామ్య తండాకు వెళ్లాల్సిందే.. ఈ పండగను ఎందుకు.. ఎలా జరుపుకుంటారో ఒకసారి చూసేద్దామా?

ఈ తండాలో భూక్య అనే ఇంటి పేరుతో గల లంబాడా గిరిజన కుటుంబాలు.. ఇంట్లో మగ పిల్లవాడు పుడితే డుండ్​ పేరుతో ఒక కార్యక్రమాన్ని నిర్వహిస్తారు. అదీ కూడా హోలీ తర్వాత మూడు రోజుల పాటు డుండ్​ పండగను నిర్వహించడం ఆనవాయితీగా వస్తుంది. మొదటిరోజు రాత్రి ఆ పిల్లవాడిని ఎత్తుకెళ్లి ఒకచోట భూక్య వంశస్థులు దాచిపెడతారు. ఆ పిల్లవాడితో పాటు ఇంట్లో ఉన్న అరిసెల మూటను కూడా దాచిపెడతారు. గ్రామస్థులంతా వాటిని వెతికి పట్టుకుని.. ఆ పిల్లవాడికి పేరు పెడతారు.

రెండోరోజు..మొదటిరోజు కార్యక్రమం ప్రారంభానికి ముందు పాతిన చాందిని అనే స్తంభం వద్ద పాయసం, అన్నం వండి నైవేద్యం పెట్టి మహిళలు.. భర్తలను, మరిది వరస అయిన వ్యక్తులను కర్రలతో కొడతారు. వారు మహిళల నుంచి తప్పించుకుని తిరుగుతారు. ఆ తర్వాత ఆ స్తంభం వద్ద ఉంచిన నైవేద్యాన్ని ఎత్తుకెళ్లడానికి ప్రయత్నిస్తారు. వారిని మహిళలు అడ్డుకుంటారు. ఈ తంతు అంతా సంప్రదాయంగా నిర్వహిస్తారు.