జగిత్యాల జిల్లాలో ఘనంగా శతచండీ హోమం - ఆకట్టుకున్న మహిళల కోలాటాలు - Satachandi Homam ended in Jagtial

Shatachandi Homam In Jagtial District : యజ్ఞ, యాగాది క్రతువులతో కులాల మధ్య సమైక్య భావనా స్ఫూర్తి కలుగుతుందని..త్రిదండి చినజీయర్‌ స్వామి ముఖ్యశిష్యులు నంబి వేణుగోపాలచార్య తెలిపారు. శృంగేరిశారదాపీఠం సంప్రదాయం ప్రకారం జగిత్యాలలో శతచండీ హోమం వైభవంగా ముగిసింది. మహిళల కుంకుమార్చన, కోలాటాలు, భజనలతో యాగం ఆద్యంతం భక్తి, శ్రద్ధలతో సాగింది.

Chandi Yagam in Jagtial :జగిత్యాల జిల్లా పద్మనాయక కల్యాణ మండపంలో శతచండీ హోమం వైభవంగా ముగిసింది. ప్రముఖ ప్రవచనకర్త, వేద, జ్యోతిష్య పండితులు తిగుళ్ల విశ్వనాథశర్మ ఆధ్వర్యంలో..ఈనెల 4నుంచి 9వరకు పంచాకుండాత్మక మహాయాగం జరిగింది. ఉమ్మడి కరీంనగర్‌, ఆదిలాబాద్‌ జిల్లా నుంచి భారీగా వచ్చిన భక్తులు ప్రత్యేక పూజల్లో పాల్గొని అమ్మవారి కృపాకటాక్షాలు పొందారు. లోక కల్యాణార్థం మొదలుపెట్టిన శతచండీ యాగానికి ముందుగా దుర్గాదేవి, గణపతి, పరమశివుడి ఊరేగింపు కన్నులపండుగగా జరిగింది. శోభాయాత్రలో మహిళల కోలాటాలు విశేషంగా ఆకట్టుకున్నాయి.

శృంగేరిశారదపీఠం సంప్రదాయం ప్రకారం జరిగిన క్రతువులో.. వేలాది మహిళలు పాల్గొని శ్రీకుంకుమార్చన నిర్వహించారు. 35 మంది వేద పండితుల ఆధ్వర్యంలో..మార్కండేయ పురాణంలో దుర్గాదేవిని స్తుతిస్తూ సాగే 700 శ్లోకాలతో కూడిన చండీపారాయణం, దుర్గాసప్తశతి హోమం నిర్వహించారు. మహాపూర్ణాహుతి అనంతరం దుర్గాదేవిని మహిళల కోలాటాలు, భజనలతో చేసిన.. నిమజ్జన వేడుక ఆకట్టుకుంది.