Police Seize Huge Money in Telangana : పోలీసుల సోదాల్లో పట్టుబడుతున్న భారీ నగదు.. ఏటీఎం డబ్బులు సైతం సీజ్..! - సరైన పత్రాలు లేని డబ్బును పోలీసులు స్వాధీనం

Police Seize Huge Money in Telangana : రాష్ట్రంలో ఎన్నికల కోడ్ నేపథ్యంలో పోలీసులు విస్తృత తనిఖీలు నిర్వహిస్తున్నారు. పలుచోట్ల అక్రమంగా తరలిస్తున్న భారీ నగదు, మద్యం, బంగారం మొదలగు విలువైన వస్తువులు పట్టుబడుతున్నాయి. ఈ క్రమంలో మెదక్ జిల్లా నర్సాపూర్ పట్టణ సమీపంలో పోలీసులు నిర్వహించిన వాహన తనిఖీలలో.. ఏటీఎంలలో డబ్బులు పెట్టే సీఎమ్​ఎస్ సంస్థ వాహనం ఒకటి సరైన పత్రాలు లేకుండా.. రూ.74 లక్షలు తరలిస్తుండడంతో పట్టణ సీఐ షేక్​లాల్ మదార్ సొమ్మును స్వాధీనం చేసుకున్నారు.

అదేవిధంగా సంగారెడ్డి జిల్లా జహీరాబాద్​ పోలీసులు చేపట్టిన సోదాల్లో భారీగా నగదు పట్టుబడింది. పట్టణ పోలీస్ స్టేషన్ ఎదుట వాహనాలు తనిఖీ చేస్తుండగా వ్యానులో తరలిస్తున్న రూ.27.30 లక్షల నగదు స్వాధీనం చేసుకున్నారు. ఈ రెండు ఘటనల్లోనూ సొమ్ముకు సంబంధించిన సరైన పత్రాలు లేకపోవడంతో డబ్బులను పోలీసులు సీజ్ చేశారు. నగదు తరలిస్తున్న వాహనాన్ని పట్టుకొని కేసు నమోదు చేశారు. ఎన్నికల అధికారుల సూచన మేరకు జిల్లా ట్రెజరీ కార్యాలయంలో జమ చేయనున్నట్లు పోలీసులు తెలిపారు.