'ఫ్రీ ఫైర్'కు బానిస.. అనుక్షణం అదే కలవరింపు!.. మతిస్థిమితం కోల్పోయిన బాలుడు
Smart Phone Addiction Boy : ప్రస్తుత రోజుల్లో స్మార్ట్ఫోన్లను చాలా మంది పిల్లలు తెగ వాడేస్తున్నారు. ఫోన్ ఇవ్వకపోతే మారాం చేసి మరీ తల్లిదండ్రుల దగ్గర నుంచి తీసుకుంటున్నారు. ప్లే స్టోర్ల నుంచి వివిధ రకాల గేమ్స్ను ఇన్స్టాల్ చేసి ఆడుతూ చాలా సమయం గడుపుతున్నారు. అలా స్మార్ట్ఫోన్లకు బానిసైన పిల్లల్లో కొందరు.. అరుదైన వ్యాధుల బారినపడుతున్నారు. తాజాగా స్మార్ట్ఫోన్కు విపరీతంగా బానిసైన ఓ బాలుడు మతిస్థిమితం కోల్పోయాడు.
రాజస్థాన్లో అల్వార్కు చెందిన ఆ బాలుడికి ప్రత్యేక పాఠశాలలోని నిపుణుల ద్వారా చికిత్స అందిస్తున్నారు. ఆ బాలుడు ఎక్కువ సమయం ఫ్రీఫైర్ ఆటలోనే గడిపేవాడని తల్లిదండ్రులు తెలిపారు.
"మా దగ్గరకు ఆ బాలుడిని అతడి తల్లిదండ్రులు తీసుకొచ్చారు. మా అంచనా ప్రకారం.. ఫ్రీఫైర్ గేమ్లో ఆ బాలుడు ఒక్కసారి ఓడిపోయాడు. దాన్ని తట్టుకోలేక అతడు మతిస్థిమితం కోల్పోయాడు. మేము ఆ బాలుడి కోసం భౌతిక ఆటల షెడ్యూల్ను తయారు చేశాం. దాని ప్రకారం ఆడిస్తున్నాం. అలా అతడికి నయం చేసేందుకు ప్రయత్నిస్తున్నాం" అని నిపుణులు భవానీ శర్మ చెప్పుకొచ్చారు.