ప్రోటోకాల్​ రగడ - క్రిస్మస్​ గిఫ్ట్​ల పంపిణీపై పల్లా రాజేశ్వర్​ రెడ్డి ఆగ్రహం

MLA Palla Rajeshwar Reddy Fires on Christmas Gifts Distribution : క్రిస్మస్​ గిఫ్ట్​ల పంపిణీ కార్యక్రమం వివాదానికి దారి తీసింది. జనగామ జిల్లా కేంద్రంలోని ఓ వేడుకల మందిరంలో మంత్రి కొండా సురేఖ ముఖ్య అతిథిగా ప్రభుత్వం అధికారికంగా క్రిస్మస్​ గిఫ్టుల పంపిణీ కార్యక్రమం నిర్వహించగా, మరో చోట ఎమ్మెల్యే పల్లా రాజేశ్వర్​ రెడ్డి ముఖ్య అతిథిగా పంపిణీ కార్యక్రమం చేస్తున్నట్లు అధికారులు ముందు ప్రకటించారు. అయితే మంత్రి కొండా సురేఖ ఈ కార్యక్రమానికి రాకపోవడంతో డీసీసీ అధ్యక్షుడు కొమ్మూరి ప్రతాప్​ రెడ్డి చేతుల మీదగా గిఫ్ట్​లు పంచారు. 

Christmas celebrations 2023 :ఎమ్మెల్యే ఉండగా, డీసీసీ అధ్యక్షుడితో ఎలా పంపిణీ చేస్తారని ఎమ్మెల్యే పల్లా రాజేశ్వర్​ రెడ్డి, బీఆర్​ఎస్​ నేతలు ఆగ్రహించారు. ఈ క్రమంలో జనగామ జిల్లా కలెక్టర్​ ఛాంబర్​లో నిరసన వ్యక్తం చేశారు. అనంతరం కలెక్టర్​ శివ లింగయ్యతో వాగ్వాదానికి దిగారు. క్రిస్మస్​ గిఫ్ట్​ల పంపిణీ కార్యక్రమానికి ముందు ఆహ్వానం రాలేదని, అధికారులంతా అధికార పార్టీకి కొమ్ముకాస్తున్నారని పల్లా రాజేశ్వర్​ రెడ్డి నిలదీశారు. కార్యక్రమంలో డీసీసీ అధ్యక్షుడిని ఎలా స్టేజ్​ మీదకి పిలుస్తారని, ఫ్లెక్సీలో కనీసం తన ఫొటో కూడా వేయలేదని ఆందోళన చేశారు. తన ఫొటో లేకుండా డీసీసీ అధ్యక్షుడి ఫొటో ఎలా కటౌట్​లో పెడతారని ఎమ్మెల్యే పల్లా రాజేశ్వర్​ రెడ్డి కలెక్టర్​పై ఆగ్రహం వ్యక్తం చేశారు.