Mangalore Car Accident Viral Video : ఫుట్​పాత్​పైకి దూసుకెళ్లిన కారు.. యువతి స్పాట్ డెడ్​.. లైవ్ వీడియో

Mangalore Car AccidentViral Video : ఫుట్​పాత్​పై నడుస్తున్న వారిపైకి కారు వేగంగా దూసుకెళ్లగా.. ఓ యువతి అక్కడిక్కడే మృతి చెందింది. మరో నలుగురు యువతులకు గాయాలయ్యాయి. ఈ ప్రమాదం కర్ణాటకలోని మంగళూరులో బుధవారం సాయంత్రం జరిగింది. దీనికి సంబంధించిన ప్రమాద దృశ్యాలు సీసీటీవీ కెమెరాలో నమోదయ్యాయి.

ఇదీ జరిగింది
మంగళూరు కార్పొరేషన్ స్విమ్మింగ్​ పూల్​ సమీపంలోని ఫుట్​పాత్​పై ఐదుగురు యువతులు నడుచుకుంటూ వెళ్తున్నారు. ఈ సమయంలోనే కమలేశ్​ బలదేవ్​ అనే వ్యక్తి కారులో మన్నగూడ జంక్షన్​ నుంచి లేడీహిల్ వైపు వెళ్తున్నాడు. వేగంగా వచ్చిన కారు.. అదుపుతప్పి ఫుట్​పాత్​పైకి దూసుకెళ్లి పాదచారులను ఢీ కొట్టింది. ఈ ప్రమాదంలో ఓ యువతి అక్కడిక్కడే మృతి చెందగా.. మరో నలుగురు యువతులు గాయపడ్డారు. దీంతో భయపడిన నిందితుడు అక్కడి నుంచి పరారయ్యాడు. అనంతరం సమీపంలోని కారు షోరూం వద్ద కారును ఆపి ఇంటికి పారిపోయాడు. తర్వాత తండ్రితో కలిసి వచ్చి మంగళూరు వెస్ట్ ట్రాఫిక్​ పోలీస్ స్టేషన్​లో లొంగిపోయాడు. దీనిపై కేసు నమోదు చేసుకున్న పోలీసులు.. దర్యాప్తు చేపట్టారు.