వేడుకలో డ్యాన్స్ చేస్తూ వ్యక్తి మృతి.. ఛాతిలో నొప్పి వచ్చినా ఆగకుండా..

వివాహ వార్షికోత్సవంలో డ్యాన్స్ చేస్తూ కుప్పకూలాడు ఓ వ్యక్తి. ఉత్తర్​ప్రదేశ్ ప్రయాగ్​రాజ్​లో ఈ ఘటన జరిగింది. ఔషధాల డీలర్​గా ఉన్న అమర్​దీప్ వర్మ(46) బంధువుల వివాహ వార్షికోత్సవ వేడుకకు తన భార్యతో కలిసి వెళ్లాడు. బంధువులంతా ఆనందంగా డ్యాన్స్ చేస్తుండగా అమర్​దీప్ సైతం కాలు కదిపాడు. కొద్దిసేపు డ్యాన్స్ చేసిన తర్వాత అతడికి ఛాతిలో నొప్పి వచ్చింది. వెంటనే కాసేపు పక్కన కూర్చున్నాడు. నొప్పి తగ్గాక మళ్లీ డ్యాన్స్ చేయడం ప్రారంభించాడు. ఈ క్రమంలోనే ఒక్కసారిగా కుప్పకూలాడు. స్పృహ కోల్పోయిన అతడిని కుటుంబ సభ్యులు ఆస్పత్రికి తరలించారు. అయితే, అతడు అప్పడికే చనిపోయాడని వైద్యులు వెల్లడించారు.