రామోజీ ఫిల్మ్‌సిటీలో ఎల్‌ఐసీ ఏజెంట్ల సందడి - సంస్థ చరిత్రలో మొదటిసారిగా ఇలా!

LIC Agents Visited Ramoji Film City :భారత జీవిత బీమా సంస్థ.. పది వేల మందికి పైగా ఎల్‌ఐసీ ఏజెంట్లకు వారి కుటుంబసభ్యులతో రామోజీ ఫిల్మ్ సిటీని సందర్శించే అవకాశం కల్పించింది. దసరా, దీపావళి సందర్భంగా పది పాలసీల లక్ష్యాన్ని పూర్తి చేసిన ఏజెంట్లకు ఫిల్మ్‌ సిటీ చూసేందుకు అవకాశం కల్పించినట్లు ఎల్‌ఐసీ సంస్థ తెలిపింది. ఆంధ్రప్రదేశ్, తెలంగాణ, కర్ణాటక రాష్ట్రాల్లో ఆ లక్ష్యాన్ని పూర్తి చేసిన ఎల్‌ఐసీ ఏజెంట్లకు ఈ అవకాశాన్ని కల్పించింది.

ఉదయం 6 గంటల నుంచి ఎల్‌ఐసీ ఏజెంట్లు ఫిల్మ్‌ సిటీని వీక్షించేందుకు తరలివచ్చారు. పెద్ద సంఖ్యలో ఏజెంట్లకు సమావేశం, పర్యటక సందర్శన ఏర్పాటు.. ఎల్‌ఐసీ సంస్థ చరిత్రలో మొదటిసారని ఆ సంస్థ జనరల్ మేనేజర్ తెలిపారు. ఫిల్మ్ సిటీ అందాలను వీక్షిస్తూ ఆనందం పొందారు. ఇంతటి అవకాశం కల్పించిన ఎల్‌ఐసీ సంస్థకు వారంతా కృతజ్ఞతలు తెలిపారు. ఇలాంటి అవకాశాలు మరెన్నో కల్పించాలని ఏజెంట్లు ముక్తకంఠంగా కోరారు.