BRS MLA Counter to Bandi Sanjay : 'మీరు భూమి తీసుకురండి.. మేం ఇళ్లు కడతాం'

BRS MLA Counter to Bandi Sanjay : తెలంగాణ ప్రభుత్వం నిర్మిస్తున్న డబుల్ బెడ్​రూం పథకంపై బీజేపీ రాష్ట్ర అధ్యక్షుడు బండి సంజయ్ చేసిన ఆరోపణలను కూకట్​పల్లి ఎమ్మెల్యే మాధవరం కృష్ణారావు తిప్పికొట్టారు. కేంద్ర ప్రభుత్వం డబుల్​బెడ్ రూమ్​ల కోసం అందజేసిన నిధులను దుర్వినియోగం చేశారన్న బండి ఆరోపణలను ఖండించారు. ఈ పథకానికి కేంద్ర ప్రభుత్వం నిధులు ఇచ్చిందని లిఖితపూర్వకంగా నిరూపించగలరా అని ప్రశ్నించారు. హైదరాబాద్ నగరంలో కేంద్ర ప్రభుత్వం ఆధీనంలో ఉన్న స్థలాలను డబుల్​బెడ్ రూమ్​లకు ఇస్తే కట్టించే బాధ్యతను తాము తీసుకుంటామని బండి సంజయ్​కు ఎమ్మెల్యే కృష్ణారావు బహిరంగ సవాల్ విసిరారు. 

ఓ పార్టీకి రాష్ట్ర అధ్యక్షుడిగా.. మరోవైపు పార్లమెంట్ సభ్యుడిగా ఉండి ఇప్పటి వరకు కరీంనగర్​కు ఎన్ని డబుల్ బెడ్​రూం ఇళ్లు మంజూరు చేయించారో చెప్పగలరా అంటూ ఎమ్మెల్యే బండి సంజయ్​కు ఛాలెంజ్ విసిరారు. కూకట్​పల్లి నియోజకవర్గ ప్రాంతంలో ప్రభుత్వ స్థలం తక్కువగా ఉందని.. కేంద్ర ప్రభుత్వం ఆధీనంలో ఉన్న ఐడీపీఎల్ సంస్థ భూములు 900 ఎకరాలు ఉన్నాయని.. కేంద్రంతో చర్చించి ఆ భూమిని డబుల్ బెడ్​రూమ్ ఇళ్లకు కేటాయించి తమ చిత్తశుద్ధిని నిరూపించుకోగలరా అని ప్రశ్నించారు. ఆ భూముల్లో రాష్ట్ర ప్రభుత్వం నుంచి డబుల్ బెడ్​ రూమ్​ ఇళ్లు నిర్మించి తాము ప్రజల పట్ల ఉన్న బాధ్యతను నెరవేర్చుకుంటామని చెప్పారు.