Jalna Maratha Reservation Protest : ఆందోళనకారులపై లాఠీచార్జ్​, టియర్ గ్యాస్ ప్రయోగం.. 25 మంది పోలీసులకు గాయాలు.. - జాల్నా లాఠీ చార్జ్

Jalna Maratha Reservation Protest : మహారాష్ట్ర జాల్నాలో చేపట్టిన మరాఠా రిజర్వేషన్ల ఆందోళనలో తీవ్ర ఉద్రిక్తత నెలకొంది. శుక్రవారం అంతర్​వాలీ గ్రామంలో జరిగిన హింసాత్మక ఘటనలో 25 మందికి పైగా పోలీసులు సహా అనేక మంది నిరసనకారులు గాయపడ్డారు. ఆందోళనకారులను చెదరగొట్టేందుకు లాఠీచార్జ్​ చేశారు పోలీసులు. అయినా పరిస్థితి అదుపులోకి రాకపోవడం వల్ల టియర్ గ్యాస్​ను ప్రయోగించారు. ఆందోళనకారులు తమపైకి రాళ్లు రువ్వారని.. పరిస్థితిని అదుపు చేసేందుకే లాఠీచార్జ్ చేశామని పోలీసులు తెలిపారు. పోలీసులు పలు రౌండ్ల బుల్లెట్లను సైతం గాల్లోకి కాల్చారని ఆందోళనకారులు చెబుతున్నారు. కానీ అధికారులు దీనిపై స్పష్టత ఇవ్వలేదు. ఈ ఘటనపై స్పందించిన ముఖ్యమంత్రి ఏక్​నాథ్ శిందే.. ప్రజలంతా శాంతియుతంగా ఉండాలని కోరారు. దీనిపై దర్యాప్తు చేసేందుకు ఓ కమిటీని ఏర్పాటు చేస్తున్నట్లు ప్రకటించారు.

అయితే, మరాఠాలకు రిజర్వేషన్లు కల్పించాలని కోరుతూ ఆందోళన చేపట్టారు ఆ వర్గం ప్రజలు. ప్రభుత్వం తమ డిమాండ్లను పట్టించుకోవడం లేదంటూ.. మనోజ్​ జరాంగే అధ్యక్షతన అమరణ నిరాహార దీక్షను చేపట్టారు. అంతకుముందు బుధవారం దీక్షా స్థలిని సందర్శించిన ముఖ్యమంత్రి ఏక్​నాథ్ శిందే.. ఆందోనకారులతో మాట్లాడారు. దీక్షను విరమించాలని కోరగా.. అందుకు వారు ఒప్పుకోలేదు.