Jagtial Bus Accident : బస్సు డ్రైవర్ అప్రమత్తతో.. దక్కిన మహిళ ప్రాణం
Woman Suicide Attempt :జగిత్యాల జిల్లా మెట్పల్లిలో ఆర్టీసీ డ్రైవర్ అప్రమత్తతో ఓ నిండు ప్రాణం దక్కింది. మెట్పల్లి నుంచి ప్యాసింజర్లను ఎక్కించుకొని జగిత్యాల వైపు వెళుతున్న ఆర్టీసీ బస్సు కింద మహిళ పడిపోయింది. ఈ క్రమంలో బస్సు ఎక్కుతున్న ప్రయాణికులు గట్టిగా కేకలు వేయడంతో అకస్మాత్తుగా డ్రైవర్ బ్రేక్ వేశాడు. దీంతో బస్సు ఆగిపోగా... మహిళ చేతికి తీవ్ర గాయాలయ్యాయి. వెంటనే స్థానికులు స్పందించి, అంబులెన్సు సహాయముతో మెట్పల్లి ప్రభుత్వ సామాజిక ఆసుపత్రికి తరలించారు. ఆమెను మెట్పల్లి పట్టణానికి చెందిన పుప్పాల లక్ష్మీగా గుర్తించారు. డ్రైవర్ ఏమాత్రం అప్రమత్తంగా లేకపోయినా నిండు ప్రాణం వెనుక చక్రాల కింద నలిగిపోయేదని స్థానికులు తెలిపారు. తొలుత ప్యాసింజర్ ఎక్కుతుండగానే డ్రైవర్ నిర్లక్ష్యంగా బస్సు నడిపాడని భావించినప్పటికీ సీసీ కెమెరాలో నమోదైన ఫుటేజ్లో మాత్రం డ్రైవర్ అప్రమత్తత వల్లనే ప్రాణం దక్కినట్లు తేలింది. సీసీ కెమెరా దృశ్యాలు పరిశీలిస్తే.. మహిళ ఉద్దేశ పూర్వకంగానే బస్సు కింద పడేందుకు యత్నించినట్లు తెలుస్తోంది.