Ind Vs Pak Asia Cup 2023 : పాక్​పై భారత్​ గెలుపు.. రోడ్లపైకి వచ్చి ఫ్యాన్స్​ సంబరాలు.. బాణసంచా కాలుస్తూ.. - ఇండియా వర్సెస్​ పాకిస్థాన్​ సూపర్ 4

Ind Vs Pak Asia Cup 2023 : ఆసియా కప్​ టోర్నీలో భాగంగా సోమవారం జరిగిన సూపర్ 4 లీగ్​లో రోహిత్ సేన పాకిస్థాన్​ జట్టును చిత్తు చేసింది. రెండు రోజుల పాటు ఎంతో ఉత్కంఠగా జరిగిన ఈ పోరులో బ్యాటింగ్, బౌలింగ్‌లో రాణించిన భారత జట్టు ఏకంగా 228 పరుగుల తేడాతో పాక్​ను ఓడించింది. రోహిత్ శర్మ, కేఎల్​ రాహుల్​, విరాట్ కోహ్లీ, శుభ్​మన్​ గిల్​ లాంటి ప్లేయర్లు క్రీజులో విజృంభించి పాక్​ బౌలర్లకు చుక్కులు చూపించారు. దీంతో పాక్​ జట్టు ఘోర పరాభవాన్ని ఎదుర్కొంది. అయితే ఈ గెలుపుతో ఆసియా కప్ ఫైనల్ చేరే అవకాశాలను రోహిత్​ సేన గణనీయంగా పెంచుకుంది.
అయితే ఆసియా కప్ లాంటి ప్రతిష్టాత్మక టోర్నీలో పాకిస్థాన్​ను చిత్తు చేయడం పట్ల.. టీమ్ఇండియా ఫ్యాన్స్​ హర్షం వ్యక్తం చేస్తున్నారు. దేశంలోని పలు చోట్ల సంబరాలు చేసుకున్నారు. యువత రోడ్డుపైకి వచ్చి బాణాసంచా కాల్చారు. డ్యాన్స్​లు చేస్తూ ఆనందాన్ని వ్యక్తపరిచారు. టీమ్ఇండియా నినాదాలతో వేడుకలు చేసుకున్నారు. దీంతో ఆ ప్రాంతమంతా సందడి సందడిగా మారింది.