Harish Rao on BRS Manifesto : 'బీఆర్​ఎస్​ మేనిఫెస్టో చూసి.. విపక్షాల గుండెలు బేజారు' - బీఆర్​ఎస్​ మేనిఫెస్టో

Harish Rao on BRS Manifesto :బీఆర్​ఎస్​ మేనిఫెస్టోను చూసి.. విపక్షాల గుండెలు జారిపోయాయని మంత్రి హరీశ్‌రావు పేర్కొన్నారు. ఒక కుటుంబ పెద్దగా ఆలోచించిన కేసీఆర్‌.. ప్రజల సంక్షేమాన్ని దృష్టిలో పెట్టుకుని మేనిఫెస్టో రూపొందించారన్నారు. నేడు రాష్ట్రంలో అర్హులైన 44 లక్షల మందికి ఆసరా పింఛన్లు ఇస్తున్నామన్నారు. కేసీఆర్​ ఇచ్చిన మాట తప్పరని.. ప్రజల గురి ముఖ్యమంత్రిపైనే ఉందన్నారు. 

Harish Rao Fires on Congress :తమ పథకాలను కాపీ చేశారంటున్న రేవంత్​రెడ్డి.. బీఆర్​ఎస్​ ప్రవేశపెట్టిన రైతుబంధు, దళితబంధు, ఫించన్లను కాపీ కొట్టి కాంగ్రెస్‌ మేనిఫెస్టోలో పెట్టుకున్నారని దుయ్యబట్టారు. నేడు రాష్ట్రంలో ఎలాంటి దరఖాస్తు పెట్టకుండానే రైతుబంధు నిధులు ఇస్తున్నామని.. ప్రతి ఇంటికి ధీమా కల్పించాలనే ఉద్దేశంతో కేసీఆర్‌ బీమా తీసుకొస్తున్నట్లు తెలిపారు. మిషన్​ భగీరథతో.. మహిళలు దశాబ్దాల పాటు అనుభవించిన మంచినీటి కష్టాలు తీర్చింది కేసీఆర్‌ సర్కారేనని పేర్కొన్నారు. రేపు సిద్దిపేటలో జరగనున్న సీఎం కేసీఆర్ ప్రగతి ప్రజా ఆశీర్వాద సభ ఏర్పాట్లను మంత్రి పరిశీలించారు. సభ ఏర్పాట్లపై నిర్వహకులకు పలు సూచనలు చేశారు.