10 కిలోల అరుదైన పుట్టగొడుగు.. మీరు ఎప్పుడైనా చూశారా? - అరుదైన జాతి పుట్టగొడుగు లభ్యం

Giant Mushroom In Sambalpur : ఒడిశాలో ఓ వ్యక్తికి దాదాపు 8 నుంచి 10 కిలోల మధ్య బరువు ఉండే పుట్టగొడుగు దొరికింది. ఈ అరుదైన పుట్టగొడుగును చూసి లూరి కిషన్ అనే వ్యక్తి ఆశ్చర్యానికి గురయ్యాడు. అసలేం జరిగిందంటే?  

సంబల్​పుర్​ జిల్లాలోని ఖలియాముండా గ్రామానికి చెందిన లూరి కిషన్​ తన పెరట్లోకి ఆదివారం ఉదయం వెళ్లాడు. ఆ పెరట్లో రకరకాల చెట్లు, పూల మొక్కలు ఉన్నాయి. అయితే లూరి కిషన్​కు ఖర్జూర చెట్టు కింద దాదాపు 8 నుంచి 10 కిలోల మధ్య ఉండే పుట్టగొడుగు కనిపించింది. వెంటనే దానిని తీసి ఇంటికి తీసుకెళ్లాడు. ఇంత పెద్ద పుట్టగొడుగును గతంలో ఎప్పుడూ చూడలేదని అన్నాడు లూరి కిషన్​. ఇది అరుదైన జాతికి చెందిన మష్రూమ్ అని భావిస్తున్నామని తెలిపాడు. గ్రామస్థులు సైతం ఇంత పెద్ద పుట్టగొడుగును చూసేందుకు తరలివచ్చారు.

2 కిలోల పుట్టగొడుగు..
కొన్నాళ్ల క్రితం.. కేరళలో దాదాపు 2 కిలోల బరువున్న పుట్టగొడుగులు మొలకెత్తి.. అందరి దృష్టిని ఆకర్షించాయి.
ఇడుక్కి జిల్లా, అదిమలైకు చెందిన కవుమ్తాదతిల్ బేబీ పెరట్లో రెండు పుట్టగొడుగులు మొలకెత్తాయి. ఒక్కో పుట్టగొడుగు దాదాపు 2 కిలోల బరువు, రెండున్నర అడుగుల వెడల్పు ఉండడం గమనార్హం. అందుకే, బేబీ పెరట్లో మొలకెత్తిన అరుదైన పుట్టగొడుగులకు సంబంధించిన వీడియో సామాజిక మాధ్యమాల్లో తెగ వైరల్ అవుతోంది. ఈ వీడియో కోసం ఇక్కడ క్లిక్ చెయ్యండి.