Ganja Gang Arrest In Hyderabad : గంజాయి ముఠా అరెస్ట్.. 23.4కిలోల సరుకుతో పాటు రూ.40 లక్షల నగదు స్వాధీనం - hyderabad latest news

Ganja Sales Gang Arrest  In Hyderabad : హైదరాబాద్‌లో అక్రమంగా గంజాయి విక్రయిస్తున్న ముఠాను రాష్ట్ర యాంటీ నార్కోటిక్‌ బ్యూరో అధికారులు పట్టుకున్నారు. ఈ గ్యాంగ్​లో నలుగురిని అరెస్టు చేయగా మరో ఆరుగురు పరారీలో ఉన్నట్లు అధికారులు తెలిపారు. వీరి నుంచి 23.4 కిలోల గంజాయి, తరలించేందుకు వినియోగించిన కారుతో పాటు రూ.40.30లక్షల నగదును స్వాధీనం చేసుకున్నామని యాంటీ నార్కోటిక్ బ్యూరో ఎస్పీ గుమ్మి చక్రవర్తి వెల్లడించారు. నిందితులకు సంబంధించిన 16 బ్యాంకుల ఖాతాల్లోని రూ.1.53 కోట్ల నగదును ఫ్రీజ్‌ చేశామన్నారు. ఇందుకు సంబంధించిన వివరాలను నగరంలోని సీసీఎస్ కార్యాలయంలో ఏర్పాటు చేసిన మీడియా సమావేశంలో వివరించారు. నిందితులు గంజాయిను కిలోకు రూ. 8వేలకు కొనుగోలు చేసిన నగరంలో ఐదు గ్రాముల చొప్పున ప్యాకెట్‌కు రూ. 250రూపాయలకు అమ్ముతూ కిలో 50వేల రూపాయల వరకు ఆదాయం పొందుతున్నారని తెలిపారు. ఇలా నిందితులు రోజుకు రూ.30వేల వరకు సంపాదిస్తున్నారని పేర్కొన్నారు. నానక్‌రాం గూడలో భవన నిర్మాణ కార్మికులు ఎక్కువగా ఉన్నారని వీరితో పాటు సాఫ్ట్‌వేర్ ఇంజినీర్లకు గంజాయిని విక్రయిస్తున్నారని తెలిపారు. నిందితులంతా ఒకే కుటుంబానికి చెందినవారని వివరించారు.