పింఛన్ నిలిపివేతపై వాగ్వాదం - బీపీ పెరిగి వృద్ధుడు మృతి, శవంతోనే వేలిముద్రలు తీసుకున్న సిబ్బంది - chittor pension news

Death of Old Man to Stop Pension : అర్హతలున్నా అధికార పార్టీకి విధేయత పింఛన్​దారుల పాలిట శాపంలా మారింది. ప్రతిపక్షాల మద్దతు దారులని తెలిస్తే ఇక అంతే!. ఓటరు జాబితాలోనూ పేరు గల్లంతే. ఇక చిత్తూరు జిల్లా కుప్పం నియోజకవర్గంలో ఓ దారుణం చోటుచేసుకుంది. అధికారుల వివక్షకు ఓ నిండు ప్రాణం బలైంది. అధికార పార్టీ నేత కానుకను తిరస్కరించినందుకు ఓ వృద్ధుడి ప్రాణాలను బలితీసుకున్నారు.  

అధికార పార్టీ నేత కానుకను తిరస్కరించినందుకేనా! :చిత్తూరు జిల్లా కుప్పం నియోజకవర్గం సోగడబల్ల గ్రామానికి చెందిన సర్దార్​ అనే వృద్ధుడికి అధికారులు పింఛన్​ నిలిపేశారు. ఈ క్రమంలో తనకు పింఛన్​ ఎందుకు ఇవ్వలేదని తెలుసుకునేందుకు సచివాలయానికి వెళ్లిన సర్దార్​ సిబ్బంది నిలదీశారు. తనకు జరిగిన అన్యాయంపై అధికారులను ప్రశ్నిస్తూ అక్కడికక్కడే కుప్పకూలిపోయాడు. దీంతో సచివాలయ సిబ్బంది 108 అంబులెన్స్​కు ఫోన్​ చేసి ఆస్పత్రికి తరలించగా అప్పటికే సర్దార్​ చనిపోయినట్టు వైద్యులు నిర్ధారించారు.  

Chittoor District : తన తండ్రి మృతికి అధికార పార్టీ నాయకులే కారణమంటూ సర్దార్ కుమారుడు ఆరోపించారు. అధికారులు రెచ్చగొట్టడం వల్లే బీపీ పెరిగి కన్నుమూశాడని కన్నీరుమున్నీరయ్యాడు. సమయానికి పింఛన్ ఇచ్చి ఉంటే బతికేవాడంటూ రోదించడం నాయకులను కంటతడి పెట్టించింది.​ రెండు రోజుల క్రితం వైసీపీ ముఖ్యనేత పార్టీ తరఫున పంచిన చీరను తన తండ్రి​ తిరస్కరించినందుకే పింఛను నిలిపివేశారని సర్దార్ ​ కుమారుడు వాపోయారు. తండ్రి మరణానంతరం వేలిముద్ర తీసుకుని సచివాలయ సిబ్బంది పింఛను ఇచ్చారని ఆవేదన వ్యక్తం చేశాడు. సకాలంలో తన తండ్రికి పింఛను ఇచ్చి ఉంటే ఈ సంఘటన జరిగి ఉండేదికాదని ఆగ్రహం వ్యక్తం చేశారు.