బైక్​పై సోదరి మృతదేహంతో సోదరుడి ప్రయాణం- అంబులెన్స్​ లేకపోవడం వల్లే! - Transportation of dead body by bike

Dead Body On Bike Viral Video : అంబులెన్స్​ అందుబాటులో లేకపోవడం వల్ల సోదరి మృతదేహాన్ని బైక్​పై ఇంటికి తీసుకెళ్లాడు ఓ యువకుడు. ఈ హృదయ విదారక ఘటన ఉత్తర్​ప్రదేశ్​లోని ఔరైయా జిల్లాలో బుధవారం జరిగింది. అందుకు సంబంధించిన వీడియో.. ప్రస్తుతం సోషల్​ మీడియాలో వైరల్​గా మారింది. అసలేమైందంటే?

జిల్లాలోని నవీన్​ బస్తీ​లో నివాసం ఉంటున్న ప్రతాప్​ సింగ్​ కుమార్తె అంజలి(20).. ఆన్​ చేసి ఉన్న వాటర్​ హీటర్​ను ప్రమాదవశాత్తు తాకింది. కొద్దిసేపటికే ఆమె ఆరోగ్య పరిస్థితి విషమంగా మారింది. దీంతో ఆమెను బిధునా ప్రాథమిక ఆరోగ్య కేంద్రానికి తరలించారు కుటుంబసభ్యులు. అప్పటికే అంజలి మరణించినట్లు సీహెచ్​సీ వైద్యులు ధ్రువీకరించారు.

అంజలి మృతదేహాన్ని ఇంటికి తీసుకెళ్లేందుకు అంబులెన్స్​ ఏర్పాటు చేయాలని సీహెచ్​సీ సిబ్బందిని ఆమె సోదరుడు కోరాడు. అయితే ఆస్పత్రిలో అంబులెన్స్​ అందుబాటులో లేకపోవడం వల్ల తన బైక్​పైనే మృతదేహాన్ని ఇంటికి తీసుకెళ్లాలని నిర్ణయించుకున్నాడు. అంజలి మృతదేహాన్ని దుప్పటితో చుట్టి.. బైక్​పై ఇంటికి తీసుకెళ్లిపోయాడు. ఆ సమయంలో అక్కడే ఉన్న స్థానికులు.. వీడియో తీసి సోషల్ ​మీడియాలో పోస్ట్​ చేయగా వైరల్​ అయింది.