మంత్రి హోదాలో తొలిసారి ఖమ్మం నగరానికి కాంగ్రెస్ నేతలు​ - ఘన స్వాగతం పలికిన పార్టీ శ్రేణులు - ఖమ్మంలో మంత్రుల రాకతో కాంగ్రెస్​ శ్రేణుల సందడి

Congress Ministers Came to Khammam : మంత్రులుగా ప్రమాణ స్వీకారం చేసిన తర్వాత మొట్టమొదటిగా జిల్లాకు వచ్చిన ముగ్గురు మంత్రులకు ఖమ్మం జిల్లా సరిహద్దు వద్ద కాంగ్రెస్ పార్టీ శ్రేణులు, అధికారులు, అభిమానులు మంత్రులకు ఘన స్వాగతం పలికారు. ఖమ్మం జిల్లా పాలేరు నియోజకవర్గం సరిహద్దు నాయకునిగూడెం వద్ద ముగ్గురు మంత్రులు తుమ్మల నాగేశ్వరరావు, భట్టి విక్రమార్క, పొంగులేటి శ్రీనివాస్ రెడ్డిలకు మహిళలు హారతి ఇచ్చి పూలమాలతో స్వాగతం పలికారు. అనంతరం ప్రచార రథంపై ముగ్గురు మంత్రులు అభివాదం చేస్తూ జనాలను ఉత్తేజపరిచారు. 

Rajiv Aarogyasri Aid To 10 Lakhs : అనంతరం కూసుమంచి మండల కేంద్రంలోని పీహెచ్​సీ ఆసుపత్రికి చేరుకున్న మంత్రులు రాజీవ్ ఆరోగ్యశ్రీ సాయాన్ని పది లక్షలకు పెంచుతూ విడుదల చేసిన పోస్టర్లను ఆవిష్కరించారు. నాయకన్ గూడెం బస్టాండ్ సెంటర్​లోని జాతిపిత మహాత్మా గాంధీ, రాజ్యాంగ నిర్మాత డాక్టర్ బాబాసాహెబ్ అంబేడ్కర్​ విగ్రహాలకు పూలమాలలు వేసి నివాళులు అర్పించారు‌. ఖమ్మం, వరంగల్ క్రాస్ రోడ్ వద్ద పెద్ద ఎత్తున తెలుగుదేశం పార్టీ శ్రేణులు ఘనంగా స్వాగతం పలికారు. నాయకన్ గూడెం నుంచి ఖమ్మం వరకు పెద్ద ఎత్తున కాంగ్రెస్ కార్యకర్తలు బైక్ ర్యాలీ నిర్వహించారు. అనంతరం మంత్రులు ర్యాలీగా ఖమ్మం నగరానికి చేరుకున్నారు.