Car Fire Petrol Bunk Viral Video : పెట్రోల్​బంక్​లో ఉన్న కారులో సడెన్​గా మంటలు.. అంతా హడల్!

Car Fire Petrol Bunk Viral Video : పెట్రోల్​ బంక్​లో ఆగి ఉన్న కారులో ఒక్కసారిగా మంటలు చెలరేగాయి. అయితే బంక్​ సిబ్బంది అప్రమత్తతంగా ఉండడం వల్ల పెను ప్రమాదం తప్పింది. కర్ణాటకలోని బెళగావిలో ఈ ఘటన జరిగింది. అసలేమైందంటే?

బెళగావి.. నెహ్రూనగర్​లోని శ్రీకృష్ణదేవరాయ సర్కిల్​ సమీపంలో ఉన్న హోస్మానీ అండ్​ సన్స్​కు చెందిన పెట్రోల్​ బంక్​కు ఓ వ్యక్తి కారులో వచ్చాడు. డీజిల్​ను పోయమని బంక్​ సిబ్బందికి చెప్పాడు. ఇంతలో కారు బానెట్​లో ఒక్కసారిగా మంటలు చెలరేగాయి. వెంటనే కారు దిగి డ్రైవర్​ పరారయ్యారు. మంటలు చెలరేగుతుండడం వల్ల పెట్రోల్​ బంక్​ సిబ్బంది అప్రమత్తమయ్యారు. అక్కడే ఉన్న ఫైర్​ పరికరాలతో మంటలను ఆర్పేందుకు ప్రయత్నించారు.

ఘటనపై సమాచారం అందుకున్న అగ్నిమాపక సిబ్బంది హుటాహుటిన బంక్​ వద్దకు చేరుకున్నారు. వెంటనే ఫైరింజన్​తో మంటలు ఆర్పివేశారు. దీంతో పెను ప్రమాదం తప్పింది. ఘటనకు సంబంధించిన దృశ్యాలు పెట్రోల్​ బంక్​లోని సీసీటీవీలో రికార్డయ్యాయి. బెళగావిలోని షాహాపుర్.. భరత్ నగర్​లో నివాసం ఉంటున్న నరేంద్ర బిర్జేకి చెందిన కారుగా స్థానికులు గుర్తించారు.