Bhainsa BRS Leaders Resignation : బీఆర్​ఎస్​కు బిగ్​ షాక్​.. భైంసాలో 1000 మంది రాజీనామా - Who resigned from BRS in Bhainsa

Bhainsa BRS Leaders Resignation : ఎన్నికల దగ్గరకు వస్తున్న సమయంలో అధికార పార్టీకి షాక్​ తగిలింది. ఓ నియోజకవర్గంలోని ప్రజానాయకులందరు మూకుమ్మడిగా రాజీనామా చేశారు. నిర్మల్​ జిల్లాలోని భైంసా మార్కెట్ కమిటీ ఛైర్మన్​ రాజేశ్​ బాబు(market committee chairman)తో పాటు పలువురు జెడ్పీటీసీ, ఎంపీపీలు, సర్పంచ్​లు, సీనియర్ నాయకులు కారుకు గుడ్​ బై చెప్పారు. పార్టీ ఆవిర్భావం నుంచి ఉద్యమ నాయకులను కాదని ఎమ్మెల్యే విఠల్​ రెడ్డికి అనుకూలమైన వ్యక్తులకే ప్రాధాన్యత ఇస్తున్నారని ఆగ్రహం వ్యక్తం చేశారు. దీంతో రాజేష్ బాబుతో పాటు జడ్పీటీసీలు 2, ఎంపీపీ 1, సర్పంచ్​లు 10, ఎంపీటీసీ 8, మాజీ జడ్పీటీసీలు 3, మాజీ ఎంపీపీలు 3, మాజీ సర్పంచ్​లు, ఎంపీటీసీలు 60 మంది రాజీనామా చేశారు. అవసరమైతే తమ పదవులను వదులుకుంటామని స్పష్టం చేశారు. 

1000 BRS Leaders Resignation in Nirmal: సీనియర్ నాయకులతో పాటు పార్టీనీ వీడిన 1000 మంది కార్యకర్తలు ముధోల్ ఎమ్మెల్యే విఠల్ రెడ్డి తీరుకు నిరసనగా ఈ నిర్ణయం తీసుకున్నట్లు నాయకులు వెల్లడించారు. ఎమ్మెల్యే తీరుపై పలుమార్లు అధిష్ఠానం దృష్టికి తీసుకెళ్లిన.. ఎలాంటి మార్పు లేకపోవడంతో  ఈ నిర్ణయం తీసుకున్నట్లు తెలిపారు. జరిగే ఎన్నికల్లో విఠల్ రెడ్డి(MLA Vittal Reddy)ని ఓడించడమే తమ ప్రధాన లక్ష్యమని తేల్చి చెప్పారు. తమ భవిష్యత్ కార్యాచరణ త్వరలో ప్రకటిస్తామని పేర్కొన్నారు. త్వరలోనే మరికొంత మంది రాజీనామా చేసేందుకు సిద్దంగా ఉన్నారని తెలిపారు.