బీఆర్​ఎస్​, బీజేపీ ఒకరికొకరు సహాయం చేసుకుంటున్నారు : ప్రియాంక గాంధీ - రేవంత్​రెడ్డి తాజా వార్తలు

Priyanka Gandhi Speech in Kodangal Meeting Today : అమరుల త్యాగాల పునాదులపై ఏర్పడిన తెలంగాణలో.. ఉద్యమ స్ఫూర్తికి విరుద్ధంగా రాష్ట్రంలో పాలన సాగుతోందని కాంగ్రెస్ అగ్రనేత ప్రియాంక గాంధీ పేర్కొన్నారు. ఎన్నికల ప్రచారంలో భాగంగా కొడంగల్​లో నిర్వహించిన విజయభేరీ సభలో పాల్గొన్నారు. రేవంత్​రెడ్డిని భారీ మెజారిటీతో గెలిపించాలని ప్రజలకు విజ్ఞప్తి చేశారు. 

Congress Election Campaign :బీఆర్​ఎస్​, బీజేపీ ఒకరికొకరు సహాయం చేసుకుంటున్నాయని ప్రియాంక గాంధీ ఆరోపించారు. కేసీఆర్ కుటుంబం.. తెలంగాణ ప్రజల సొమ్మును దోచుకుందని ఆరోపించారు. బీఆర్​ఎస్​ హయాంలో పేదలు, నిరుద్యోగుల సమస్యలు తీరలేదని.. రాష్ట్రంలో రైతుల ఆత్మహత్యలు పెరిగాయని దుయ్యబట్టారు. కేసీఆర్​ అధికారంలోకి వచ్చి పదేళ్లు గడిచాయి.. నిరుద్యోగుల సమస్యలు తీరాయా? రైతుల కష్టాలు తీర్చరా? అని ప్రజలను ప్రశ్నించారు. సీఎం కేసీఆర్​ ప్రాజెక్టుల పేరుతో కమీషన్లు దండుకున్నారు తప్ప ప్రజలకు చేసిందేం లేదని విమర్శించారు. ఎన్నికల్లో కోట్లు ఖర్చు చేసి గెలవాలని కేసీఆర్ చూస్తున్నారని.. ఆ డబ్బు ఎక్కడి నుంచి వచ్చిందో చెప్పాలని ప్రశ్నించారు. రైతుల రుణాలు మాఫీ చేయని మోదీ.. తన మిత్రులకు మాత్రం వేల కోట్లు మాఫీ చేశారని మండిపడ్డారు. ధరణి పేరుతో ప్రజల భూములను బీఆర్​ఎస్​ సర్కారు గుంజుకుందని.. దొరల తెలంగాణలో ప్రజలకు ఒరిగిందేం లేదని దుయ్యబట్టారు. దొరల తెలంగాణకు చరమగీతం పాడి.. ప్రజల ప్రభుత్వాన్ని ఏర్పాటు చేసుకుందామని ప్రజలకు పిలుపునిచ్చారు. కాంగ్రెస్ అధికారంలోకి రాగానే ఆరు గ్యారంటీలను అమలు చేస్తామని హామీ ఇచ్చారు.