నిండు గర్భిణీని 6 కిలోమీటర్లు డోలీలో మోస్తూ... - Pregnant woman carried in a cloth cradle for 6 kms

సాంకేతిక రంగంలో దేశం నానాటికీ ముందుకు పోతున్నప్పటికీ.. కొన్ని గ్రామాల పరిస్థితులు మాత్రం మారట్లేదు. పలు మారుమూల పల్లెలకు ఇప్పటికీ సాగు నీరు, తాగు నీరు, కరెంటు వసతులు లేక ప్రజలు తీవ్ర ఇబ్బందులు పడుతున్నారు. తమిళనాడు ఈరోడ్​ జిల్లా అంతియూర్​ గ్రామంలోని బర్కుర్​ కొండ ప్రాంతానికి సరైన రోడ్డు వసతి లేక.. కుమారి అనే నిండు గర్భిణి ప్రాణాలు కోల్పోయే పరిస్థితి తలెత్తింది. 108కి ఫోన్​ చేసినప్పటికీ వర్షాలు పడి రహదారి మరింత అధ్వానంగా తయారైనందున అంబులెన్స్​ గ్రామానికి చేరలేకపోయింది. అయితే ఆమె భర్త స్థానికుల సాయంతో.. కుమారిని అంబులెన్స్​ వరకు దాదాపు ఆరు కిలోమీటర్లు డోలీలో మోసుకెళ్లాడు. అక్కడి నుంచి అంబులెన్సులో ప్రాథమిక ఆసుపత్రికి తరలిస్తుండగా మార్గ మధ్యలోనే కుమారి మగబిడ్డకు జన్మనిచ్చింది. ప్రస్తుతం తల్లీబిడ్డ క్షేమంగా ఉన్నారు.