Vitamin D Deficiency Symptoms : నిపుణుల అభిప్రాయం ప్రకారం.. శరీరం ప్రతిరోజూ కనీసం 1,500-2,000 అంతర్జాతీయ యూనిట్లు లేదా IU విటమిన్ Dని పొందాలి. కొవ్వుతో కూడిన చేపలు, బలవర్ధకమైన పాల ఉత్పత్తులు వంటి అనేక ఆహారాలలో ఈ విటమిన్ ఉన్నప్పటికీ.. ఆహారం ద్వారా మాత్రమే పూర్తిగా పొందడం కష్టం. ఎండ నుంచి సహజంగా కూడా పొందాల్సి ఉంటుంది. లేదంటే.. పలు సమస్యలు వేధిస్తాయి.
తరచుగా అనారోగ్యం :బాడీలో ఎప్పుడైతే రోగనిరోధక శక్తి తగ్గుతూ ఉంటుందో.. అప్పట్నుంచి తరచూ అనారోగ్యానికి గురవుతారు. అయితే మన శరీరంలో ఇమ్యూనిటీ పవర్ పెంచడంలో విటమిన్ డి కీలక పాత్ర పోషిస్తుంది. ఇది ఇన్ఫెక్షన్లతో పోరాడే కణాలతో నేరుగా చర్య జరపుతుంది. కాబట్టి ఈ విటమిన్ లోపిస్తే తరచుగా జలుబు, ఫ్లూ వంటి వ్యాధుల బారిన పడుతారు.
ఎముకల నొప్పి : మీ శరీరంలో విటమిన్ డి లోపం ఉంటే.. తీవ్రమైన ఎముక నొప్పికి గురవుతారు. అంటే ఈ విటమిన్ లోపంతో సంబంధం ఉన్న ఆస్టియోమలాసియా, బోలు ఎముకల వ్యాధి, రికెట్స్ వంటి వ్యాధులు వస్తాయి. అలాగే కీళ్ల నొప్పులు, కండరాల నొప్పులు వస్తాయి. దీనికి ముఖ్య కారణం విటమిన్ డిలో ఉండే కాల్షియం తగ్గడమే. కాబట్టి ఈ సమస్యలు ఉన్నా వైద్యుడిని సంప్రదించి టెస్టులు చేయించుకోవడం బెటర్.
డిప్రెషన్ : నిపుణుల అభిప్రాయం ప్రకారం.. విటమిన్ డి లోపం ఉంటే మానసిక సమస్యలు వస్తాయంటున్నారు. ముఖ్యంగా డిప్రెషన్, ఆందోళన వంటి ఈ విటమిన్ స్థాయిలు తగ్గినట్లు మీ మానసిక స్థితిపై ప్రభావం చూపుతాయంటున్నారు నిపుణులు.
జుట్టు రాలడం : చాలా మందికి వెంట్రుకలు ఊడిపోతుంటే ముందుగా డిప్రెషన్, కొన్ని ఆరోగ్య సమస్యలు మాత్రమే గుర్తొస్తాయి. కానీ వీటితోపాటు విటమిన్ డి లోపం ఉన్నా జుట్టు రాలుతుందని అనేక అధ్యయనాలు చెబుతున్నాయి. వీటితో పాటు వంధ్యత్వం, నిస్సత్తువ, త్వరగా గాయాలు మానకపోవడం వంటివి లక్షణాలు ఉన్నా వైద్యుడిని సంప్రదించి ఈ విటమిన్ టెస్ట్ చేయించుకోవడం బెటర్.