కొంతమందికి కడుపు నిండుగా తిన్నా తీపి, ఉప్పు, పుల్లపుల్లటి ఆహార పదార్థాలను చూడగానే మళ్లీ తినాలన్న కోరిక కలుగుతుంది. వీటినే ఫుడ్ క్రేవింగ్స్ (ఆహార కోరికలు) అంటారు. ముఖ్యంగా గర్భిణులకు ఇవి ఎక్కువగా కలుగుతుంటాయి. ఈ నేపథ్యంలో తమ జిహ్వ చాపల్యాన్ని తీర్చుకోవడానికి పిజ్జా, బర్గర్‌, ఫ్రెంచ్‌ ఫ్రైస్‌, చిప్స్, ఐస్క్రీమ్స్ వంటి జంక్ ఫుడ్స్‌ను ఆశ్రయిస్తారు.
అదుపు చేసుకోండిలా!
సాధారణంగా గర్భం ధరించిన మహిళలకు ఈ ఆహార కోరికలు ఎక్కువగా కలుగుతుంటాయి. అదేవిధంగా మూడ్‌ స్వింగ్స్‌, పని ఒత్తిడి, హార్మోన్ల అసమతుల్యత, పోషకాహార లోపం కూడా ఈ ఫుడ్ క్రేవింగ్స్‌కు కారణమవుతాయి. ఇలాంటి సమయాల్లో జంక్‌ఫుడ్స్‌ను తీసుకోవడం వల్ల శరీరంలో క్యాలరీల శాతం పెరుగుతుంది. ఊబకాయం తదితర అనారోగ్య సమస్యలు తలెత్తుతాయి. అందుకే ఈ ఆహార కోరికలను అదుపులో ఉంచుకోవాలంటున్నారు పోషకాహార నిపుణులు.
నీళ్లు ఎక్కువగా తీసుకోవాలి..
నీళ్లు తగిన మోతాదులో తీసుకోవడం వల్ల ఆహార కోరికలు నియంత్రణలో ఉంటాయి. అదేవిధంగా శరీరం రోజంతా హైడ్రేటెడ్‌గా ఉంటుంది.
ఎక్కువ గ్యాప్‌ ఇవ్వద్దు!
బ్రేక్‌ఫాస్ట్‌, లంచ్‌, డిన్నర్‌ల మధ్య ఎక్కువ గ్యాప్‌ ఇవ్వద్దు. అదేవిధంగా తక్కువ మోతాదులో తిన్నా ఇతర ఆహార పదార్థాలపైకి మనసు మళ్లుతుంది. అందుకే మధ్య మధ్యలో కాస్త బాదం, వాల్నట్స్, పండ్లు వంటి ఆరోగ్యకరమైన స్నాక్స్‌ తీసుకుంటూ ఉండాలి.
బాగా నమిలి మింగండి!
ఆహారాన్ని బాగా నమిలి మింగడం వల్ల ఆహార కోరికలు తగ్గిపోతాయని పోషకాహార నిపుణులు సూచిస్తున్నారు. ఈ విషయంలో చూయింగ్‌ గమ్‌ కూడా సమర్థంగా పనిచేస్తుందని సూచిస్తున్నారు.