పీరియడ్స్​ కోసం మందులు వాడుతున్నారా? మరిన్ని చిక్కులొస్తాయి - ఇలా సరిచేసుకోండి!

Reason for Irregular Periods : ఈ మధ్య కాలంలో ఎక్కువ మంది మహిళలు ఎదుర్కొనే ప్రాబ్లమ్.. రుతుక్రమంలో ఇబ్బందులు! సక్రమంగా పీరియడ్స్ రాకపోవడంతో.. కొంత మంది మందులు కూడా వాడాల్సిన పరిస్థితి వస్తోంది. దీంతో.. లేనిపోని ఇతర అనారోగ్య సమస్యలు కొనితెచ్చుకుంటున్నారు. ఈ పరిస్థితికి కారణమేంటో ఈ స్టోరీలో తెలుసుకోండి.

Reason for Irregular Periods :ప్రతి ఆడపిల్లకూ రుతుక్రమం తప్పనిసరి. ఓ వయసు వచ్చాక వారిలో నెలనెలా పీరియడ్స్ రావడం అనేది సహజం. అయితే.. ప్రస్తుత కాలంలో చాలా మంది మహిళలు పీరియడ్స్(Periods)సమస్య ఎదుర్కొంటున్నారు. సకాలంలో రాకపోవడం.. బ్లీడింగ్ సరిగా కాకపోవడం వంటి ఇబ్బందులు ఫేస్ చేస్తున్నారు. దీంతో.. కొందరు మహిళలు ఆ సమస్యకు కారణం తెలియకుండానే వివిధ హార్మోన్లకు సంబంధించిన మందులు వాడుతున్నారు. ఇలా వాడడం ద్వారా తీవ్రమైన ఆరోగ్య సమస్యలు తలెత్తుతాయని నిపుణులు హెచ్చరిస్తున్నారు. అసలు పీరియడ్స్ సమయానికి ఎందుకు రావు? దానికి గల కారణాలేంటి..? ఈ సమస్య నుంచి ఎలా బయటపడాలి..? అనే వివరాలు ఈ స్టోరీలో తెలుసుకుందాం.

ఆ సైకిల్​లో పడకండి..

మహిళల్లో ఇర్రెగ్యులర్ పీరియడ్స్ కారణంగా.. శరీరంలో హార్మోన్ల అసమతుల్యత ఏర్పడుతుంది. దీనివల్ల పీసీఓడీ(PCOD) లాంటి ఆరోగ్య సమస్యలతోపాటు ఇంకా చాలా ఇబ్బందులు ఎదురవుతాయి. వీటికోసం.. మందులు వాడాల్సి వస్తుంది. ఫలితంగా.. చాలా మంది స్త్రీలు బరువు పెరుగుతారు. బరువు పెరగడం వల్ల పీరియడ్స్ సమస్యలు మరింత తీవ్రమవుతాయి. ఇలా.. ఓ అనారోగ్యకర సైకిల్​లో మహిళలు పడిపోతారని వైద్య నిపుణులు చెబుతున్నారు. ఈ సమస్యకు ప్రధాన కారణం బరువు పెరగడం అని చెబుతున్నారు. మహిళ్లల్లో బరువు పెరగడం రుతుక్రమాన్ని దెబ్బతీస్తుందని హెచ్చరిస్తున్నారు.

మరికొన్ని కారణాలు..

ఇంకా..సమయానికి తిండి తినకపోవడం, నిద్రలేమి, జీవనశైలిలో మార్పు కూడా పీరియడ్స్ సక్రమంగా రాకపోవడానికి కారణం అవుతాయని చెబుతున్నారు. ఆడపిల్లల్లో పొట్టచుట్టూ చేరే కొవ్వును విసరల్ ఫ్యాట్ అంటారు. దీని కారణంగా శరీరంలోని ఇన్సులిన్‌ సరిగ్గా పనిచేయదు. దాంతో సమయానికి అండం విడుదల కాదు. వీటన్నింటీ కారణంగా నెలసరి సక్రమంగా రాదు. అప్పుడు నెలసరి సరిచేసేందుకు హార్మోన్‌ మాత్రలు వాడాల్సి వస్తుంది. మందులతో మరిన్ని సమస్యలు వస్తాయి.

Best Tips forIrregular Periods :ఈ సమస్య నుంచి బయటపడడం మహిళల చేతుల్లోనే ఉందని చెబుతున్నారు.మీరు ఒకవేళ బరువు ఎక్కువగా ఉంటే అది తగ్గడానికి ట్రై చేయండి. మంచి ఆహారాన్ని తీసుకుంటూ, రోజువారీ వ్యాయామం చేయాలి. పచ్చళ్లు, స్వీట్లు, చక్కెర, వేపుళ్లు లాంటి ఆహార పదార్థాలను దూరం పెట్టండి. అలాగని పూర్తిగా తిండి మానేయకూడదు. అదేవిధంగా ఉదయాన్నే నడక ప్రారంభించండి. ఇవన్నీ చేయడం ద్వారా మీరు బరువు తగ్గే అవకాశాలు ఉంటాయి. అప్పుడు మీకు పీసీఓడీ ప్రాబ్లమ్ ఉంటే తగ్గి, గర్భం ధరించడమూ సులభం అవుతుంది.

లేకపోతే ప్రెగ్నెన్సీ సమయంలో బీపీ, షుగర్‌ లాంటివి వచ్చే అవకాశం లేకపోలేదని ఆరోగ్య నిపుణులు హెచ్చరిస్తున్నారు. అలాగే అబార్షన్లు ఎక్కువగా జరిగే ప్రమాదమూ ఉందంటున్నారు. కాబట్టి డాక్టర్‌ ఇచ్చిన మందులు వాడుతూనే బరువు తగ్గే ప్రయత్నం చేయాలి. వరుసగా మూడు నెలలు నెలసరి రాకపోతే గర్భాశయంలో ఉండే పొర మందం అయిపోయి, మరికొన్ని కొత్త అనారోగ్య సమస్యలకు దారితీస్తుంది. కాబట్టి ఈ విషయంలో జాగ్రత్తగా ఉండాలని వైద్య నిపుణులు సూచిస్తున్నారు.