శరీర సామర్థ్యం (ఫిట్‌నెస్‌) బాగుంటే ఆరోగ్యమూ బాగుంటుంది. దీనికి వ్యాయామం ఎంతగానో ఉపయోగపడుతుంది. అయితే దీన్ని సక్రమంగా చేయటం ముఖ్యం.
'ఫిట్‌నెస్‌' కోసం వ్యాయామం చేస్తున్నారా?.. కానీ ఆ పొరపాట్లు మాత్రం..
ఫిట్‌నెస్‌ను కాపాడుకునేందుకు కొందరు జిమ్కు వెళ్లి వ్యాయామం చేస్తుంటారు. అలా చేయడం వల్ల ఆరోగ్యంగా ఉంటారని నిపుణులు చెబుతున్నారు. అయితే చిన్నచితకా కారణాలతో వ్యాయామాన్ని ఆపేయడం కరెక్ట్ కాదని నిపుణులు అంటున్నారు.
ఫిట్‌నెస్‌
ఇవీ పాటించండి:
- చిన్నా చితకా కారణాలతో వ్యాయామాన్ని ఆపటం తగదు. దీంతో ఫిట్‌నెస్‌ లక్ష్యాన్ని చేరుకోవటం కష్టమవుతుంది. అప్పటివరకూ సాధించిన పురోగతి వెనక పడుతుంది.
- వ్యాయామాలకు ఉపక్రమించటానికి రెండు గంటల ముందు భోజనం చేస్తే కండరాలకు తగినంత రక్తం సరఫరా కాదు. దీంతో వ్యాయామ బడలిక నుంచి కోలుకోవటం కష్టమవుతుంది. కండరాలు పట్టేయటం, వికారానికి దారితీస్తుంది.
- ముందుగా సన్నద్ధ వ్యాయామాలు చేయటమూ ముఖ్యమే. దీంతో శరీరంలో ఉష్ణోగ్రత పెరుగుతుంది. రక్త సరఫరా పుంజుకుంటుంది. ఫలితంగా కండరాలు వదులవుతాయి. తేలికగా కదులుతాయి.
- కండరాలను సాగదీసే సమయంలో కుదురుగా, స్థిరంగా ఉండటం తప్పనిసరి. అటూఇటూ కదులుతున్నట్టయితే కండరాలు నొప్పి పుడతాయి. బిగుతుగా అవుతాయి. శరీరాన్ని సాగదీసిన ప్రతిసారీ 20 నుంచి 30 సెకండ్ల పాటు అదే భంగిమలో ఉండాలి.
- సరైన భంగిమలో ఉండేలా చూసుకోవటం ప్రధానం. లేకపోతే కింద పడిపోవచ్చు, గాయాలు కావొచ్చు. ఉదాహరణకు- ట్రెడ్‌మిల్‌ మీద నడిచేటప్పుడు పరికరం మీద వాలిపోవద్దు. శరీరం తిన్నగా ఉండేలా చూసుకోవాలి. బరువులు ఎత్తేటప్పుడు వెన్నెముకను తిన్నగా.. భుజాలు వెనక్కి, విశ్రాంతిగా ఉంచాలి. మోకాళ్లను మరీ బిగుతుగా పట్టి ఉంచొద్దు.
- కొన్నిరకాల వ్యాయామాలు చేస్తున్నప్పుడు సహజంగానే ఊపిరి బిగపడుతుంటారు. ఇది తగదు. ఊపిరి బిగపడితే శరీరానికి ఆక్సిజన్‌ తగ్గుతుంది. కాబట్టి బరువులు ఎత్తుతున్నప్పుడు ముందే గట్టిగా శ్వాస తీసుకోవాలి. నెమ్మదిగా బయటకు వదలాలి.
- సామర్థ్యాన్నీ దృష్టిలో పెట్టుకోవాలి. శక్తికి మించి బరువులు ఎత్తితే నొప్పులు మొదలవుతాయి. మొత్తానికే వ్యాయామాలను ఆపేయాల్సి రావొచ్చు. ఒకవేళ ఎక్కువ బరువులు ఎత్తాలనుకుంటే ఒకేసారి కాకుండా కొద్దికొద్దిగా పెంచుకుంటూ రావాలి. అనువుగా అనిపించినప్పుడే అదనపు బరువును జోడించుకోవాలి.