మీ కూరల్లో గ్రేవీ చిక్కగా రావడం లేదా? ఇలా ట్రై చేస్తే అచ్చు రెస్టారెంట్‌ స్టైల్​ గ్యారెంటీ!

Cooking Tips in Telugu : రెస్టారెంట్ కర్రీస్​ను.. థిక్ గ్రేవీతో, మంచి కలర్​తో చూడగానే తినేయాలనిపిస్తాయి. అదే ఇంట్లో వండినప్పుడు.. ఎంత ట్రై చేసినా ఆ విధంగా రాదు. కొన్నిసార్లు అన్ని రకాల మసాలా దినుసులు వేసినా సరైన రుచి రాకపోవడంతో పాటు గ్రేవీలోనూ చిక్కదనం రాదు. అలాంటి వారి కోసం అదిరిపోయే టిప్స్ పట్టుకొచ్చాం. వీటిని ఓసారి ట్రై చేశారంటే అచ్చు రెస్టారెంట్ దానిలా గ్రేవీతో పాటు రుచి అదిరిపోద్దంతే.!

Best ​Cooking Tips for Thick Gravy :రెస్టారెంట్ స్టైల్లో గ్రేవీ కూరలు తయారు చేయాలని చాలా మంది తహతహలాడుతుంటారు. కానీ అవి ఓ పట్టాన కుదరవు. కొన్నిసార్లైతే థిక్ గ్రేవీ కోసం ట్రై చేస్తే.. పల్చగా, జారుడుగా వస్తుంటుంది. అప్పుడు ఎంతో కష్టపడి కర్రీ చేసినా వృథాయేనా అన్న ఫీలింగ్ వచ్చేస్తుంటుంది. అయితే అలాంటప్పుడు మేము చెప్పే ఈ టిప్స్ పాటించారంటే.. మీరు చేసిన కూరల(Curries)కు చిక్కని గ్రేవీ రావడంతో పాటు రుచి కూడా అదిరిపోతుంది. అలాగే ఆరోగ్యానికి కూడా అవి చాలా హెల్ప్ చేస్తాయి. మరి, గ్రేవీకి చిక్కదనం అందించే ఆ చిట్కాలేంటో ఈ స్టోరీలో తెలుసుకుందాం..

జీడి పప్పుతో.. మీరు ఎప్పుడైనా పనీర్‌ గ్రేవీ, కాజూ మసాలా, ఆలూ మసాలా, చికెన్‌ మసాలా, పన్నీర్‌ మఠర్‌ మసాల వంటి రిచ్‌ గ్రేవీ కర్రీస్ వండేప్పుడు జీడిపప్పు పేస్ట్‌ని ఉపయోగించండి. ఎలాగంటే ముందుగానే కొన్ని జీడిపప్పుల్ని వేయించుకొని మెత్తటి పేస్ట్‌లా చేసుకొని.. పైన పేర్కొన్న కర్రీస్ ఉడికేప్పుడు తిప్పుతూ మిక్స్‌ చేసేయండి. ఇది గ్రేవీ చిక్కగా వచ్చేలా చేయడంతో పాటు కర్రీ టేస్ట్‌ కూడా సూపర్​గా ఉంటుంది. ఆరోగ్యానికీ మంచిది. ఇకపోతే జీడిపప్పుకు బదులుగా.. బాదం, గుమ్మడి, నువ్వులు, పల్లీలు కూడా వాడుకోవచ్చు.

పెరుగుతో..అలాగే కొన్ని రకాల మసాల కూరలు వండేటప్పుడు పెరుగు, ఫ్రెష్‌ క్రీమ్‌లను వాడడం ద్వారా కూడా చిక్కటి గ్రేవీ తీసుకురావచ్చు. ఇందుకోసం మీరు ఒక బౌల్‌లో చిక్కటి పెరుగు తీసుకుని బాగా కలపాలి. తర్వాత ఆ మిశ్రమాన్ని కూరలో వేసి మిక్స్ చేసుకోవాలి. అయితే కలిపే ముందు గ్యాస్‌ సిమ్‌లో పెట్టుకుంటే..పెరుగు అనేది తరకలుగా రాకుండా ఉంటుంది. ఇక దీనిలో కొద్దిగా మసాలా, కారం వేస్తే గ్రేవీ చిక్కగా రుచికరంగా వస్తుంది. పెరుగు.. కర్రీకి మంచి మైల్డ్‌ టేస్ట్​ను తీసుకొస్తుంది.

శనగపిండి కలపొచ్చు..మీరు చేసే కర్రీ గ్రేవీ చిక్కగా రావడానికి మరో అదిరిపోయే చిట్కా ఏంటంటే.. శనగపిండిని కలపడం. దీనికోసం ముందుగా రెండు టేబుల్‌ స్పూన్ల వేయించిన శనగపిండిని ఒక గిన్నెలో తీసుకోవాలి. తర్వాత అందులో నీళ్లు పోస్తూ, ఉండలు కట్టకుండా, మరీ చిక్కగా, మరీ జారుడుగా కాకుండా ఆ పిండిని కలుపుకోవాలి. ఆపై దానిని ఉడుకుతున్న కూరలో వేసి బాగా మిక్స్ చేసుకోవాలి. ఇకపోతే శనగపిండి కర్రీ టేస్ట్‌ను కూడా పెంచుతుంది. ఆరోగ్యానికీ శనగ పిండి ఎంతో మేలు చేస్తుంది.

టమాటాతో..ఇక చాలా మంది రుచి కోసం టమాటాలను కూరలలో కట్ చేసి వేస్తుంటారు. అలా కాకుండా టమాటా ప్యూరీ రెడీ చేసుకొని వేసుకుంటే అటు రుచితో పాటు ఇటు చిక్కని గ్రేవీ కర్రీకి వస్తుంది. అది ఎలా చేసుకోవాలంటే.. ఒక ప్యాన్‌లో కొద్దిగా నూనె వేసి కొన్ని ఉల్లిపాయ ముక్కలు, వెల్లుల్లి రెబ్బల్ని దోరగా వేయించాలి. ఆ తర్వాత ఒక కప్పు టమాటా ముక్కల్ని అందులో వేసి.. ఓసారి కలిపి మూత పెట్టి మగ్గనివ్వాలి. ఆపై బాగా మగ్గిన వాటిని పూర్తిగా చల్లారనిచ్చి మిక్సీ పట్టుకోవాలి. అంతే రుచికరమైన టమాటా ప్యూరీ సిద్ధం. ఈ విధంగా ప్రిపేర్ చేసుకున్న ప్యూరీని ఏ కర్రీలోనైనా నేరుగా వాడేయచ్చు. ఇది కూరకు రిచ్‌ లుక్‌, థిక్ గ్రేవీని కూడా తీసుకొస్తుంది.