బెల్లం తింటే ప్రయోజనాలు బోలెడు!

తియ్య తియ్యటి అరిసెలు.. ప్రసాదంలా పెట్టే పరమాన్నం పండగనాడు తింటుంటే ఆహా అనకుండా ఉండలేం. అయితే వీటిలో వేసే బెల్లం వల్లే ఆ రుచి వస్తుంది. కేవలం రుచి మాత్రమే కాకుండా దీని నుంచి బోలెడు పోషకాలూ మనకు లభిస్తాయి. ఇది చాలా రకాలుగా మనకు మేలు చేస్తుంది. అవేంటో చూద్దామా..

పండగ ఏదైనా.. ప్రతి వంటింట్లో తప్పకుండా చేరే పదార్థం బెల్లం. పిండివంటలకు రుచిని తెచ్చే బెల్లానికి.. అనారోగ్యాలని దరిచేరకుండా చేసే శక్తీ ఉంది.

• బెల్లం జీర్ణక్రియ సాఫీగా జరిగేలా చేసి మలబద్ధకం సమస్యను తగ్గిస్తుంది. అందుకే చాలా మంది భోజనం తర్వాత బెల్లం ముక్కను నోట్లో వేసుకుంటారు.
• ఇది డిటాక్స్​లా పనిచేసి శరీరంలోని వ్యర్థాలు, విషాలను బయటకు పంపేస్తుంది. అంతేకాదు రోగనిరోధకతను పెంచి ఇన్​ఫెక్షన్స్​ రాకుండా చూస్తుంది.
• మహిళలు రోజూ కొద్దిగా బెల్లం తినడం వల్ల నెలసరి ఇబ్బందుల నుంచి ఉపశమనం లభిస్తుంది.
• బెల్లం తిన్న వెంటనే శక్తి లభిస్తుంది. ఇది చాలా సేపటి వరకు అలాగే ఉంటుంది.
• ఈ తీపి పదార్థంలో యాంటీ ఆక్సిడెంట్లు, జింక్​, సెలీనియమ్ లాంటి ఖనిజాలు మెండుగా ఉంటాయి. ఇవి మనకు హాని చేసే ఫ్రీ రాడికల్స్​ను అడ్డుకుంటాయి.
• దీన్ని క్రమం తప్పకుండా తీసుకుంటే రక్తపోటు నియంత్రణలో ఉంటుంది.
• బెల్లంలో ఇనుము, ఫోలేట్​ ఎక్కువ మొత్తంలో ఉంటాయి. కాబట్టి దీన్ని తీసుకుంటే రక్తహీనత సమస్య దరిచేరదు. అనీమియాతో బాధపడే మహిళలు దీన్ని తమ ఆహారంలో చేర్చుకుంటే సరి. అలాగే గర్భిణులు కూడా.

ఇదీ చూడండి:బరువు తగ్గాలా? వ్యాయామం అప్పుడే చేయండి!