Orphan Kids story in Yadadri : అనాథలైన ముగ్గురు చిన్నారులు.. ఆదుకోవాలని నానమ్మ వేడుకోలు

Orphan Kids story in Yadadri : ఓ కుటుంబం ఆనందంగా జీవనం సాగించాలంటే తండ్రి, తల్లి వారితో పాటు కుటుంబ సభ్యులు ఎంతో ముఖ్యం. చిన్నపిల్లలకు అమ్మనాన్నలే అన్నీ. అలాంటిది వారే ఈ లోకాన్ని వదిలేసి వెళ్లిపోతే.. ఆ చిన్నారుల ఆలనాపాలనా చూసే నాథుడే కరవు అవుతారు. అలాంటి సంఘటనే యాదాద్రి భువనగిరి జిల్లాలో చోటుచేసుకుంది. తల్లిదండ్రుల మరణంతో ముగ్గురు పిల్లలు అనాథలైపోయారు.

Orphan Kids story in Yadadri : విధి వక్రీకరించడంతో ఓ కుటుంబంలోని ముగ్గురు చిన్నారులు అనాథలయ్యారు. ఐదేళ్ల కిందట తల్లి అనారోగ్యంతో మృతిచెందగా..... 4 రోజుల క్రితం తండ్రి మరణం తీవ్ర వేదనకు గురిచేసింది. చిన్నారుల జీవితానికి తీరని శోక సంద్రాన్ని మిగిల్చింది. మాటలు రాని, చెవులు వినపడని ఓ సోదరుడితో.... మరో ఇద్దరి బాగోగులు చూసుకుంటున్న ఓ ముసలి నానమ్మతో ఆ కుటుంబం జీవనం సాగిస్తున్నారు. దాతలెవరైనా స్పందించి ఆదుకోవాలని కోరుతున్నారు.

యాదాద్రి భువనగిరి జిల్లా అడ్డగూడూరు మండలం చిర్రగూడూరుకు చెందిన బొడ్డు నాగయ్య కూలీ పని చేస్తూ కుటుంబాన్ని పోషించేవాడు. శుక్రవారం అనారోగ్యంతో మృతి చెందగా... దహన సంస్కారాలకు సైతం డబ్బులు లేకపోవడంతో గ్రామపంచాయతీ ట్రాక్టర్‌లో మృతదేహాన్ని తరలించి..... దహన సంస్కారాలు నిర్వహించారు. నాగయ్యకు ఇద్దరు కుమారులు, ఒక కుమార్తె ఉన్నారు. నాగయ్య భార్య లక్ష్మీ ఐదేళ్ల క్రితం మృతి చెందారు. దీంతో 12 ఏళ్ల కుమార్తె, 9 ఏళ్ల మూగ బాలుడు, ఏడేళ్ల బాలుడు హైదరాబాద్‌లోని అనాథ హాస్టళ్లలో ఉంటూ ప్రభుత్వ పాఠశాలల్లో చదువుతున్నారు. నాలుగు నెలల క్రితమే నాగయ్య తండ్రి సోమయ్య కూడా క్యాన్సర్ వ్యాధితో చనిపోయారు. తల్లిదండ్రులను కోల్పోయి బిక్కుబిక్కుమంటూ నాయనమ్మ దగ్గర ఉంటున్నారు. ఎవరైనా తమను ఆదుకోవాలని వేడుకుంటున్నారు.

'నా కుమారుడు, కోడలు ఇద్దరు చనిపోయారు. నా భర్త కూడా మృతి చెందాడు. వారి పిల్లలను నాకు వదిలేసి వెళ్లిపోయారు. నాకేమో మోకాళ్ల నొప్పితో ఎక్కడికి వెళ్లలేక పోతున్నాను. నా కుమారుడు చనిపోతే దహన సంస్కారాలు చేయడానికి కూడా నా దగ్గర డబ్బులు లేకపోతే స్థానికులు సాయం చేశారు. అలాంటిది ఈ ముగ్గురు పిల్లలను నేను ఎలా పోషిస్తాను. తినడానికి కూడా చాలా ఇబ్బందులు పడుతున్నాం. ముగ్గురు పిల్లల్లో ఒకరికి అంగవైకల్యం ఉంది. మాకు ఎవరైనా దాతలు సాయం చేయాలని కోరుతున్నాను. ప్రభుత్వం కూడా స్పందించి మాకు సాయం చేయాలి.' - చిన్నపిల్లల నానమ్మ

నాగయ్య అనారోగ్యంతో బాధపడుతున్న సమయంలో తనకున్న ఎకరం వ్యవసాయ భూమి ధరణి లో నమోదు కాకపోవడంతో రైతు బంధు, రైతు బీమా వర్తించడంలేదని స్థానికులు తెలిపారు. అధికారులు, నాయకులు స్పందించి రైతు బీమా వర్తించేలాచేసి.. అనాథలైన ముగ్గురు పిల్లలను ఆదుకోవాలని గ్రామస్థులు కోరుతున్నారు. ఆరు పదుల వయస్సులో నాయనమ్మ పిల్లల బాధ్యతలను చూసుకుంటుదని... ఆ నిరుపేద కుటుంబాన్ని దాతలు ఆదుకొని, చిన్నారులకు చేయూతనందించాలని గ్రామస్థులు కోరుతున్నారు.

ఇవీ చదవండి :