'ట్యాంక్‌బండ్‌పై పాపన్న విగ్రహం ఏర్పాటు చేయాలి'

యాదాద్రి భువనగిరి జిల్లా ఆలేరు మండలం కొలనుపాకలో సర్దార్ సర్వాయి పాపన్న విగ్రహాన్ని మాజీ ఎంపీ బూర నర్సయ్య గౌడ్‌తో కలిసి భువనగిరి ఎంపీ కోమటిరెడ్డి వెంకట్‌రెడ్డి ఆవిష్కరించారు. సర్వాయి పాపన్న పోరాటం మాటల్లో చెప్పలేనిదని కోమటిరెడ్డి అన్నారు. ఆయన కీర్తి కేవలం విగ్రహాలకే పరిమితం కాకుండా... పోరాట స్ఫూర్తిని అలవర్చుకోవాలని సూచించారు.

పోరాట యోధుడు సర్దార్ సర్వాయి పాపన్న విగ్రహాన్ని ట్యాంక్ బండ్‌పై ఏర్పాటు చేయాలని ప్రభుత్వాన్ని భువనగిరి ఎంపీ కోమటిరెడ్డి వెంకట్‌రెడ్డి డిమాండ్ చేశారు. యాదాద్రి భువనగిరి జిల్లా ఆలేరు మండలం కొలనుపాకలో సర్దార్ సర్వాయి పాపన్న విగ్రహాన్ని మాజీ ఎంపీ బూర నర్సయ్య గౌడ్‌తో కలిసి శనివారం ఆవిష్కరించారు.

బడుగు బలహీన వర్గాల కోసం పోరాటం చేసిన మహోన్నత వ్యక్తి సర్దార్ పాపన్న గౌడ్‌ అని... ఆయన పోరాట స్ఫూర్తిని ఆదర్శంగా తీసుకోవాలని కోమటిరెడ్డి అన్నారు. పాపన్న గౌడ్ కీర్తి కేవలం విగ్రహా ఆవిష్కరణలకే పరిమితం కాకూడదని... ఆయన ఆశయ సాధనకోసం అందరం పనిచేయాలని కోమటిరెడ్డి సూచించారు.

తెరాస పాలనలో గీత కార్మికులకు ప్రత్యేక గుర్తింపు లభించిందని మాజీ ఎంపీ బూర నర్సయ్య గౌడ్‌ అన్నారు. నీరా పరిశ్రమను స్థాపించడం, ప్రమాదాల్లో మరణించిన, గాయపడిన గీత కార్మికులకు ఎక్స్‌గ్రేషియాను పెంచడం ఇందుకు నిదర్శనమని చెప్పారు. ఓటును అమ్ముకొని బానిసలుగా బతుకుతారో లేక ఓటును నమ్ముకొని పాలకులుగా ఉంటారో గౌడ సామాజిక వర్గం తెల్చుకోవాలని పేర్కొన్నారు.

ఇదీ చదవండి :ఏకధాటి వర్షాలతో హైదరాబాద్‌ అతలాకుతలం