యాదాద్రి భువనగిరి జిల్లా యాదాద్రిలో జరుగతున్న అభివృద్ధి పనులపై రాష్ట్ర రోడ్లు, భవనాల శాఖ మంత్రి వేముల ప్రశాంత్ రెడ్డి అసంతృప్తి వ్యక్తం చేశారు. ఆలయంలో జరుగుతున్న పనుల పురోగతిపై అధికారులతో చర్చించారు. పనితీరు సరిగాలేని సంబంధిత అధికారులపై ఆగ్రహం వ్యక్తం చేశారు. ఉదయం నుంచి నాలుగు గంటల పాటు కొండకింద జరుగుతున్న కల్యాణ కట్ట, పుష్కరిణి, అన్నదాన సత్రం, ప్రెసిడెన్షియల్ సూట్ల నిర్మాణం, దీక్షాపరుల మండపం పనులను ఆయన పరిశీలించారు.
అనంతరం ప్రభుత్వ విప్ గొంగిడి సునీతతో కలిసి స్వామివారిని దర్శించుకుని ప్రత్యేక పూజలు చేశారు. పునర్మిస్తున్న ప్రధానాలయ పనులను పరిశీలించారు. కొండ కింద నిర్మాణ పనులు 60 శాతం, ప్రధానాలయంలో 95 శాతం పనులు పూర్తయినట్లు వెల్లడించారు. ఆలయ పునఃప్రారంభ తేదీని చినజీయర్ స్వామితో చర్చించాక సీఎం నిర్ణయం తీసుకుంటారని తెలిపారు.