Yadadri temple: భక్తులు రాక, సందడి లేక.. వెలవెలబోతున్న యాదాద్రి ఆలయం

కరోనా కట్టడి కోసం ప్రభుత్వం విధించిన లాక్​డౌన్ కారణంగా యాదాద్రి శ్రీ లక్ష్మీ నరసింహ స్వామి ఆలయం భక్తులు లేక వెలవెలబోతోంది. నిత్యారాధనలు, ప్రత్యేక పూజలన్నీ అంతరంగికంగానే నిర్వహిస్తున్నట్లు ఆలయ అధికారులు చెబుతున్నారు.

నిత్యం భక్తులతో కిటకిటలాడే యాదాద్రి శ్రీ లక్ష్మీ నరసింహ స్వామి ఆలయం లాక్​డౌన్ కారణంగా బోసిపోయింది. తోపులాటలతో నిండుగా ఉండే దర్శన వరుసలు ఖాళీగా మారాయి. సంతను మరిపించేలా అగుపించే ప్రసాదాల కౌంటర్లు నిర్మానుష్యమయ్యాయి. కరోనాను అరికట్టేందుకు సర్కారు విధించిన లాక్​డౌన్ కారణంగా దైవదర్శనాలు, మొక్కు పూజలను నిలిపివేశారు. దీంతో భక్తుల రాక పూర్తిగా తగ్గడం వల్ల రద్దీ ప్రాంగణాలన్నీయు స్తబ్దత రూపం దాల్చాయి. స్వామి వారికి జరిగే పూజలన్నీ ఆంతరంగికమే.

లాక్​డౌన్ పొడగింపుతో..

లాక్​డౌన్ పొడగింపు కారణంగా దైవ దర్శనాలకు వేసిన తెర ఈ నెల 9 తేదీ వరకు తీయరు. అప్పటి వరకు ఆలయంలోకి భక్తులను అనుమతించరు. దర్శనాలతో పాటు మొక్కు పూజల నిర్వహణను ఈనెల 9 దాకా నిలిపి వేస్తున్నట్లు శ్రీలక్ష్మీనరసింహ్మ స్వామి దేవస్థానం నిర్ణయించింది. ప్రస్తుతం జరుగుతున్న తీరులోనే ఆలయ విధులు కొనసాగుతాయని ఆలయ ఈవో గీత తెలిపారు. భక్తులు లేకుండానే నిత్యారాధనలు కొనసాగిస్తామని ఆలయ పూజారులు, అధికారులు చెబుతున్నారు.

ఇదీ చదవండి :ఆనందయ్య మందు.. కోటయ్య మృతి